ER-BATYR жобасында - актер, композитор және ақын Рамазан Амантай. Ол Тимур Балымбетовпен сұхбат барысында неліктен тарих факультетіне оқуға түскені, болашақ жарымен қалай танысқаны, ата-анасының үлгі-өнегесі оның отбасылық өміріне қалай әсер еткені, сондай-ақ әкесінің үйреткен басты қағидасы туралы әңгімелеп берді. Жаңа шығарылымды ER-BATYR YouTube-арнасынан көре аласыздар.
Жоба ұйымдастырушылары - Alash Media Group медиахолдингі және Montessori Qazaqstan қоғамдық қоры. Ақпараттық серіктестер - "Жетінші арна", Vostok FM радиоарнасы және "ВКонтакте" әлеуметтік желісі. Жобаның серіктесі - Altel ұялы байланыс операторы.
Эфир қонағы неліктен ҚазҰУ-дың тарих факультетін "кітапханашы" мамандығы бойынша білім алғанын айтты.
"Кішкентай кезімнен арманымның бәрі, ойымның бәрі тек өнер болды. Өзімді басқа ешқандай жерден көре алмайтынмын. Біреу заңгер, біреу басқа болғысы келеді ғой. Бала арман көп қой. Бірақ мен өзімді тек кинодан көретінмін, тек соны ойлай беремін. Біреу хабарласып қалса екен, біреу шақырып қалса екен деген сияқты, кастингтерге барып қоямын. Қатты күтемін соны. Сол күн өмірімдегі ең бақытты күн сияқты баратынмын. "Кітапхана" мамандығын таңдаған себебім мен Жүргеновке түсе алмадым. Жүргеновке түсудің қиын жақтарын бәрі біліп отырған шығар іштей. Артық ештеңе демей-ақ қояйын, кейбір әділетсіздіктің кесірінен түсе алмадым. Сөйтіп ҚазҰУ-нен осы мамандық бұйырып тұрғаннан кейін сол жаққа оқуға бірден тапсырдым. Оның үстіне ҚазҰУ-не оқушы кезден барып жүретінмін. Өзіме аурасы, атмосферасы ұнайтын. Бірақ сол жаққа түскеніме өкінбеймін. Сол жақтан бүкіл керегімді таптым. Сол жақ маған мүмкіндік берді, өнермен айналысуға мүмкіндік берді. Сондықтан солай болды", - дейді актер.
Рамазанның айтуынша, ол Абайдың бала күнін сомдағысы келеді.
"Ол бала күнгі арманым. Үйде жүріп, шапан киіп, басыма тақиямды киіп, айнаға қарап тұрып: "Шыңғыстаудың етегінде Құнанбай ауылы бар. Мен сол Құнанбайдың ортаншы ұлы Абаймын" дейтінмін. Армандайтынмын. сол арманым әлі өлмей келе жатыр. Өзім өлеңге жақын болғаннан кейін, Абай атамыз ақындардың алды ғой, сол кісінің балалық шағын ойнау арманым еді. Әлі армандаймын", - дейді Рамазан.
Сонымен қатар, өнер иесі болашақ жарымен қалай танысқанын айтты.
"Біз танысқанда "Той думан" радиосында жұмыс істейтін. Көзге бірден оттай басылды. "Өзіңнің адамың жолыққанда бір белгі беріледі" деген сөзге сенбейтінмін. Бірақ сол кезде көрдім де: "Сені көріп, есім кетті, өмірім де өзгерді" дегендей болды. Бірден түсіндім өзімнің адамым екенін. бір айдың ішінде ата-анаммен таныстырдым. Ата-анам қос қолдап, төрт аяқтап қолдады. Анам: "Осы қызды алып кел" деді. Анамның сынынан, кастингінен өту қиын. Мен ойлап едім, қатты уайымдадым, "мына кісінің кастингінен өтпей қалады-ау" деп, бірақ сол кісі көзіне жас алды да "осы қызды алып кел, балам" деді", - дейді актер.
Рамазанның сөзінше, ата-анасының көрсеткен үлгісі оның отбасылық өміріне және жарына деген қарым-қатынасына әсер еткен.
"Менің әкем, анам шығармашылық адамдары ғой. Эмоцияларын ішіне жасырмайды. Бір-бірін қатты қолдайды. Әкем мұңайып қалған кезде анам тартып, анам ауырып қалған кезде әкем ештеңеге қарамай аяғын жылы суға салып, қамқорлық танытатын. Бізге күшті үлгі көрсетіп өсірді. Көбіне әкелер үйде көп болмайды, бірақ менің әкем әкенің мейіріміне шомылдырып өсірген. Өзімде отбасылық тәжірибем аз ғой, бірақ мен жақсы жар болуға тырысамын. Өзінің сезімін білдіруге ұялатын ер адамдарға айтарым: "Ата-анаң бір-бірін жақсы көріп тұрғаны жаман ба? Сенің күйеубалаң қарындасыңды көпшіліктің алдында еркелетіп тұрса жақсы емес пе?". Өз басым көмектесіп, сезім көрсетіп тұруға ұялмаймын. Себебі әйел күң емес", - дейді актер.
Актердің сөзінше, оның әкесі ең алдымен рухани құндылықты бағалайды.
"Ол рухани құндылықтармен өмір сүретін адам. Дүние жинап, мал жинап өзін көрсететін адам емес. "Дүниеге алданбаңдар, адамның көңілі бірінші" дейді. Соңғы ақшасын біреуге бере салатын адам. Адамның көңілін бағалап тұратын кісі. "Ешкімнің көңілін қалдырма, ешкімнің ала жібін аттама" дейді. Шешім қабылдайтын болсам, "Әкем не істер еді?" деп ойлап тұрамын", - дейді актер.
ER-BATYR - ер адамдарға арналған ерлер туралы, ер адамның қоғамдағы ролі, оларға артылған жауапкершілік пен саналы ер адамның отбасының және қоғамның дамуына қосатын үлесі жайлы жоба. Жоба аясында танымал кәсіпкерлер, спортсмендер, түрлі мамандық иелері өмір құндылықтары, жанұясының тұрмыс-салты, сондай-ақ ер адамның отбасындағы және қоғамдағы ролі туралы айтады.
Бұған дейін жоба қонақтары футболшылар Давид Лория мен Самат Смақов, актерлер Тәуекел Мүсілім мен Санжар Мәди, шоумен және тележүргізуші Марат Оралғазин, коммуникация бойынша маман Әлішер Елікбаев, "Фридом Финанс" компаниясының бас директоры Тимур Турлов, кәсіпкер Райымбек Баталов, медиамагнат Арманжан Байтасов, Asar-ume қайырымдылық қорының негізін қалаушы Асхат Нұрмашев, Ninety one тобының продюсері Ерболат Беделхан, продюсер және актер Нұрлан Қоянбаев, сондай-ақ "Қазақтелеком" АҚ басқарма төрағасы Қуанышбек Есекеев болған.
Жобаның барлық шығарылымын ER-BATYR YouTube-арнасынан қараңыздар. Жобаның Instagram әлеуметтік желісіндегі ресми парақшасы - erbatyrkz.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
