کونړ کې امنیتي مسولین وايي، په تېرو ۲۴ ساعتونو کې يې په اسمار او غازي اباد ولسوالیو کې د ۱۱ بهرنیو وسله والو په ګډون يې ۲۸ وسله والو طالبانو ته مرګ ژوبله اړولې ده.
د کونړ امینه قوماندانۍ ویاند فریدالله دهقان ازادي راډیو ته وویل: "د افغان امنیتي او دفاعي ځواکونو په توپچي او هوايي بریدونو کې د کونړ د اسمار ولسوالۍ د ډپبروړو، ډپ خوړ او د غازي اباد ولسوالۍ د ترناب په سېمه کې شل تنه وژل شوي چې په دې کې ۱۱ تنه بهرني او نور داخلي طالبان دي او اته تنه يې ټپیان شوي دي. د یادو بریدونو او وسله والو طالبانو سره په جګړه کې افغان ځواکونو ته زیان نه دی اوښتی."
دهقان وايي، له تېرې یوې اوونۍ راهیسې په اسمار او غازي اباد ولسوالیو کې وسله والو طالبانو د ناړۍ او اسعداباد ترمنځ لاره تړلې چې افغانو د یادې لارې د خلاصون لپاره یې عملیات پیل کړي.
دی وايي، له یادې لارې يې ګڼ ماینونه او موانع لري کړي او په وینا یې یوې اوونۍ کې يې ګڼو وسله والو طالبانو ته مرګ ژوبله اړولې ده.
تراوسه وسله والو طالبانو د حکومت د یادې ادعا او عملیاتو په اړه څه نه دي ویلي.
