მოსკოვში დააკავეს პანკ-როკ ჯგუფ Pussy Riot-ის მონაწილე მარია ალიოხინა და დაურეგისტრირებელი პარტიის, „ე.ვ. ლიმონოის სხვა რუსეთის“ მოსკოვის განყოფილების უფროსი ოლგა შალინა. ამის შესახებ „მედიაზონა“ იტყობინება. ისინი კუნცევოს რაიონის პოლიციის განყოფილებაში მიიყვანეს.
მანამდე პოლიციამ დააკავა Pussy Riot-ის ორი სხვა წარმომადგენელი ალექსანდრა სოფეევა და ანა კუზმინიხი, ასევე მოსკოვის მუნიციპალიტეტის დეპუტატი ლიუსია შტეინი. ამ უკანასკნელს ბრალად დასდეს პოლიციის თანამშრომლებისადმი დაუმორჩილებლობა.
სოფეევაზე ოქმი შეადგინეს აკრძალულ ადგილებში ალკოჰოლის მოხმარების ბრალდებით.
გუშინ Pussy Riot-ის კიდევ ერთი წევრი, ვერონიკა ნიკულშინა, 15 დღით დააკავეს პოლიციის კანონიერი მოთხოვნებისადმი დაუმორჩილებლობის ბრალდებით. ნიკულშინაზე ოქმი შეადგინეს აქტივისტის უარის გამო, პოლიციის განყოფილებაში მისულიყო ახსნა-განმარტების მისაცემად. რაპორტის მიხედვით, პოლიციელებს სურდათ ეკითხათ მისთვის, აპირებდა თუ არა სანქტ-პეტერბურგში ევრო-2020-ის ღონისძიების ჩაშლას.
ნიკულშინა იყო Pussy Riot-ის იმ მონაწილეთა შორის, რომლებიც 2018 წელს რუსეთში პოლიტიკური რეპრესიების წინააღმდეგ ბრძოლის ფარგლებში საფეხბურთო მოედანზე გავიდნენ მსოფლიო ჩემპიონატის ფინალური მატჩის დროს. მაშინ ის სამ ადამიანთან ერთად დააკავეს 15 დღით და დააჯარიმეს.
