ՆԱՏՕ-ի գլխավոր քարտուղար Ենս Ստոլտենբերգը հայտարարել է, որ ՆԱՏՕ-ի գագաթնաժողովը դաշինքին Ուկրաինայի և Վրաստանի անդամակցության վերաբերյալ հստակ կամ հնարավոր ժամկետներ չի հաղորդելու, սակայն ՆԱՏՕ-ի դուռը միշտ բաց է մնում և Ռուսաստանն այս գործընթացում վետոյի իրավունք չունի, հայտնում է ՏԱՍՍ լրատվական գործակալությունը։
«Մենք հաստատում ենք Վրաստանի և Ուկրաինայի վերաբերյալ Բուխարեստի գագաթնաժողովի որոշումն առ այն, որ ՆԱՏՕ-ի դուռը բաց է մնում և Ռուսաստանն այս գործընթացի վրա որևէ ազդեցություն չունի։ Մենք այդ ժամանակ անդամակցության ժամկետի մասին ոչինչ չենք ասել և այդ մասին չենք խոսելու նաև հիմա», - ասել է Ստոլտենբերգը։
Ավելի վաղ Բրյուսելում ՏԱՍՍ-ի դիվանագիտական աղբյուրը նշել էր, որ ՆԱՏՕ-ն հաստատելու է Վրաստանի և Ուկրաինայի՝ դաշինքին անդամակցելու հավանականությունը, սակայն Անդամակցության գործողությունների ծրագրի կամ որոշակի ժամկետների տրամադրման հեռանկարներ չեն քննարկվելու և հավելել է, որ ՆԱՏՕ-ին անդամակցելու համար Ուկրաինան և Վրաստանը նախ պետք է լուծեն Ռուսաստանի հետ իրենց տարածքային հակամարտությունները, հակառակ դեպքում նրանց անդամակցությունը դաշինքին Ռուսաստանի Դաշնության հետ ռազմական բախման եզրին կկանգնեցնի։