წლების შემდეგ ბოლნისის კინოთეატრში პირველი კინოჩვენება გაიმართება. კინოთეატრის გაცოცხლების იდეა 20-მდე ახალგაზრდას ეკუთვნის. ერთ-ერთ მათგანს, ვანო ერისთავს რადიო თავისუფლება ესაუბრა.
როგორც ის ყვება, კინოთეატრის გაცოცხლების იდეა ჯერ კიდევ 2014 წელს ჰქონდათ - დაასუფთავეს შენობა, გაიმართა კინოჩვენებები, თუმცა მცდელობა "ნაყოფიერი" არ აღმოჩნდა. ახლა მათ კინოთეატრის ამუშავებაში "ინდიგო" ეხმარება. როგორც ვანო ერისთავი ამბობს, ეხმარებიან, საზოგადოებას რომ ხმა მიაწვდინონ.
ხვალინდელი ფილმის გასაშვებად მზადება რამდენიმე კვირის წინ დაიწყო. კიდევ ერთხელ დაასუფთავეს კინოთეატრის შენობა, გაიტანეს ნაგავი, ჩაატარეს სადეზინფექციო სამუშაოები.
"ჩვენ ვართ საინიციატოვო გუნდი, რომელსაც ჩვენს ქალაქზე შეგვტკივა გული და გადავწყვიტეთ ჩვენი ძალებით აღვადგინოთ შენობა. კომუნიკაცია გვაქვს მერიასთანაც და ერთ აზრზე ჩამოვყალიბდით, რომ ეს შენობა უნდა აღდგეს. ყველაფერი დროსთან არის დაკავშირებული, რადგან არ არსებობს ქვეყანაში რეგიონული კინოთეატრების მართვის გამოცდილება", - ამბობს ვანო ერისთავი.
წლების შემდეგ პირველი კინოჩვენება ხვალ, 13 ივნისს გაიმართება. ბოლნისში გიგა ლიკლიკაძე თავის ფილმს "ღორი" ჩაიტანს.
