Ақтөбеде жасөспірім жүріп бара жатқан автомобиль капотынан құлап, ауыр жарақат алып, ауруханаға түсті, - деп хабарлайды Tengrinews.kz тілшісі.
10 маусымда бірнеше жасөспірім бау-бақша ұжымындағы үйдің ауласында тұрған "ВАЗ-21083" автокөлігін иесінен сұрамай өзенге айдап кеткен. Қайтар жолда екі бала автокөліктің капотына отырып видео түсірген.
Кетіп бара жатқанда кәмелетке толмаған балалардың бірі ұстана алмай, капоттан құлап түседі, салдарынан жарақат алып, Ақтөбенің ҰҚШҰ-на жеткізіледі.
ҚР ҚК 345-бабы 2-бөлігі "Жол қозғалысы ережелерін бұзу" бойынша соталды тергеу басталды.
Ақтөбе облысы ПД басшысы Атығай Арыстанов жолда кәмелетке толмағандармен болған барлық жазатайым оқиғаның негізгі себебі - жол қозғалысы ережелерін сақтамау және көлік жүргізушілерінің де, балалардың да мәдениетінің төмен болуынан екенін айтты.
"Кез келген ата-ана баласы апатқа кездейсоқ түседі деп ойлайды, сосын өзінен басқаның барлығын болған оқиғаға кінәлайды. Құрметті ата-аналар, баланың рөлге отырғанына сіз ғана кінәлі боласыз, өйткені сіз оған толық жауаптысыз", - деп түсіндірді Арыстанов.
Сілтемесіз жаңалық оқисыз ба? Онда "ВКонтакте" желісінде парақшамызға тіркеліңіз!