Թեհրանում ուկրաինական ինքնաթիռի կործանման հարցերով զբաղվող իրանցի բարձրաստիճան դիվանագետ Մոհսեն Բահրավանդը հայտարարել է, որ Իրանը համաձայնել է 150 հազար դոլար փոխհատուցում վճարել վթարի հետևանքով զոհվածներից յուրաքանչյուրի համար, հայտնում է Tehran Times թերթը։
Կիևում տեղի ունեցած Իրան-Ուկրաինա բանակցությունների 3-րդ փուլից հետո դիվանագետն ասել է, որ մանրամասն իրավական քննարկում է տեղի ունեցել, և հավելել, որ ուկրաինական ինքնաթիռի կործանման գործը քննվում է իրանական դատարանում՝ 3 դատավորների կողմից։ Նա նշել է, որ, Քաղաքացիական ավիացիայի միջազգային կազմակերպության (ICAO) խորհրդատվական խմբի և ԱՄՆ-ի ու Միացյալ Թագավորության փորձագետների հետ համագործակցությամբ Իրանի ավիացիոն մասնագետների իրականացրած քննությունների, ինչպես նաև ռազմական և դատական քննությունների արդյունքում պարզվել է, որ կործանման պատճառը մարդկային սխալն է։
Դիվանագետը նշել է, որ Իրանի կառավարությունը համաձայնել է 150 հազար դոլար փոխհատուցում վճարել զոհերի ընտանիքներին, ինչն ավելին է, քան սահմանված է միջազգային իրավունքով։ Նա նշել է, որ մասնագիտական խնդիրները քաղաքականացնելը վնասում է բոլորին, և հավելել, որ Իրանը պատրաստ է համագործակցության՝ պայմանով, որ կճանաչվի Իսլամական Հանրապետության հեղինակությունը և կհարգվեն Իրանի կառավարության ինքնիշխանությունն ու անձեռնմխելիությունը։
Հիշեցնենք, որ անցյալ տարի Թեհրանի օդանավակայանից մեկնելուց անմիջապես հետո Կիև թռչող Boeing 737-800 օդանավը լույս հունվարի 8-ին վթարի էր ենթարկվել: Ըստ պաշտոնական տվյալների` վթարի հետևանքով մահացել է 176 մարդ` Իրանի, Ուկրաինայի, Կանադայի, Մեծ Բրիտանիայի, Գերմանիայի, Շվեդիայի և Աֆղանստանի քաղաքացիներ: Ինքնաթիռի կործանումը հաջորդել էր իրանցի բարձրաստիճան զինվորական Ղասեմ Սոլեյմանիի սպանությանն ի պատասխան Իրանի կողմից Իրաքում գտնվող ամերիկյան ավիաբազային ուղղված տասնյակ բալիստիկ հրթիռների արձակմանը։ Ինքնաթիռն ընկալվել է որպես հրթիռ և թիրախավորվել։
Իրանի նախագահ Հասան Ռոհանին Twitter սոցիալական կայքի իր էջում հայտնել էր, որ «Զինված ուժերի ներքին հետաքննության արդյունքում պարզվել է, որ, ցավոք, մարդկային սխալի պատճառով արձակված հրթիռներն են հանգեցրել ուկրաինական ինքնաթիռի սարսափելի աղետին և 176 անմեղ մարդկանց մահվանը»:
