Եվրոպական խորհրդի ղեկավար Շառլ Միշելը խոստացել է, որ ԵՄ-ն իր օդային տարածք ու օդանավակայաններ բելառուսական բոլոր ավիափոխադրողների մուտքի արգելքից հետո մոտ օրերս նաև երկրի ֆիզիկական և իրավաբանական անձանց դեմ անհատական պատժամիջոցներ կսահմանի։
«Մենք ամենավճռական կերպով Բելառուսին կոչ ենք անում ազատ արձակել բոլոր քաղբանտարկյալներին։ Այս արգելքին կհաջորդեն իրավաբանական և ֆիզիկական անձանց նկատմամբ պատժամիջոցները»,- Twitter-ում գրել է Միշելը:
Նա նաև ընդգծել է, որ «ԵՄ-ն իր խոսքի տերն է»։
«Կեսգիշերից բելառուսական ավիափոխադրողների ինքնաթիռներին արգելվում է թռչել ԵՄ-ի օդային տարածքով։ Պաշտոնական որոշումն այսօր ընդունվել է Rayanair չվերթի հարկադիր վայրէջքի կապակցությամբ»,- գրել է նա։
Հիշեցնենք, որ Ryanair ավիաընկերության Boeing 737-800 օդանավը, որն իրականացնելիս է եղել Աթենք-Վիլնյուս չվերթը, մայիսի 23-ին արտակարգ վայրէջք է կատարել Մինսկում: Օդանավի վայրէջքից հետո օդանավակայանում ձերբակալվել է չվերթի ուղևորներից մեկը`բելառուսական ընդդիմադիր NEXTA թելեգրամյան ալիքի համահիմնադիր Ռոման Պրոտասևիչը: Վերջինիս 15 տարվա ազատազրկում է սպառնում: Նրա նկատմամբ գործ է հարուցվել զանգվածային անկարգություններին մասնակցելու համար։
