Журналіста і сябра «Саюзу палякаў у Беларусі» Андрэя Пачобута затрымалі 25 сакавіка ў Горадні і даставілі на допыт у Следчы камітэт у Менску.
Андрэя Пачобута перавезлі ў Жодзінскае СІЗА. Раней яго ўтрымлівалі ў СІЗА № 1 Менска. Паведаміла Беларуская асацыяцыя журналістаў.
Журналіста і сябра «Саюзу палякаў у Беларусі» Андрэя Пачобута затрымалі 25 сакавіка ў Горадні і даставілі на допыт у Следчы камітэт у Менску. У статусе падазраванага па крымінальнай справе паводле ч. 3 арт. 130 Крымінальнага кодэксу (здзяйсненне групай асобаў наўмысных дзеянняў па прыкмеце нацыянальнай, рэлігійнай, моўнай прыналежнасці і рэабілітацыі нацызму) яго пакінулі пад вартай у СІЗА-1.
Санкцыя артыкулу прадугледжвае ад 5 да 12 гадоў зняволення.
Пераслед Андрэя Пачобута адбываецца ў рамках ціску на польскую меншасць у Беларусі. Следам за ператрусамі і затрыманнямі прадстаўнікоў Саюзу палякаў у Берасцейскай і Гарадзенскай абласцях улады пачалі праверку ўстановаў, дзе вывучаецца польская мова і культура.
Раней Андрэй Пачобут ужо быў палітычным зняволеным. У 2011 годзе Гарадзенсая абласная пракуратура пачала супраць яго крымінальную справу за абразу і паклёп на прэзідэнта Беларусі. Судовы працэс быў закрытым. 5 ліпеня таго ж году суддзя Ленінскага раённага суду Гародні Віталь Ляцко асудзіў яго на 3 гады пазбаўлення волі з адтэрміноўкай на 2 гады за паклёп. Па артыкуле, які тычыўся абразы прэзідэнта, журналіст быў апраўданы і вызвалены ў залі суду.
Новы адрас для лістоў Андрэю Пачобуту: следчая турма №8. 222163, Жодзіна, вул. Савецкая, 22А.
Следчы камітэт працягвае пераслед польскіх актывістаў у рамках свайго расследавання. У апошнія дні кіраўнікоў структураў Саюзу палякаў Беларусі выклікалі для допытаў у Гародня, Менску, Маладэчне, Індуры ды іншых месцах.
