Վրաստանում «Բորժոմի» հանքային ջրերի շշալցման գործարանի աշխատակիցները գործադուլ են հայտարարել՝ պահանջելով ավելի բարձր աշխատավարձ և ավելի լավ աշխատանքային պայմաններ: Այս մասին գրում է netgazeti.ge կայքը:
Գործադուլ են հայտարարել ընկերության մոտ 350 աշխատակից, որոնք աշխատում են «Բորժոմի» N1 և N2 շշալցման գործարաններում:
Գյուղատնտեսության, առևտրի և արդյունաբերության արհմիության փոխանցմամբ՝ աշխատակիցներն ասում են, որ իրենց աշխատավարձերը տարեկան 200-250 լարիով կրճատվում են, աշխատակազմի սղության պատճառով նրանք չեն կարողանում ընդմիջում անել և վճարվում են արտաժամյա աշխատանքի միայն մի փոքր մասի դիմաց: Ընկերությունը, որում աշխատում են գործադուլավորները, կոչվում է «Իդեաս Բորժոմի Ջորջիա», դրա տնօրենը ՌԴ քաղաքացի Գեորգի Պավլովն է: Այս ընկերությունը, իր հերթին, պատկանում է «Իդեաս Բորժոմի Բեվերեյջս» ընկերությանը, որը գրանցված է Նիդերլանդներում:
Արհմիությունը նշել է նաև ընկերության դիրքորոշումը, որտեղ նշել են, որ «մայիսի 1-ին ընկերության ներկայացուցիչները շատ հիմնավոր առաջարկ են արել՝ բարձրացնել աշխատողների աշխատավարձերը», բայց գումարի չափը չի նշվում: Դրանից հետո ղեկավարությունը նշել է, որ մայիսի 14-ին արհմիությունից հաղորդագրություն է ստացել գործադուլ սկսելու մասին և աշխատակիցներին զգուշացնում է.
«Այս նամակով ընկերությունը պաշտոնապես հայտարարում է, որ աշխատավարձերը բարձրացնելու ընկերության բոլոր առաջարկներն ուժը կկորցնեն գործադուլավոր աշխատակիցների համար»:
