Ես կարծում եմ՝ միջազգային հանրությունն ադեկվատ է գնահատում իրավիճակը, և բոլոր կողմերից մենք տեսնում ենք գնահատականներ, որ ադրբեջանական գործողությունները սադրանք են ՀՀ ինքնիշխան տարածքի նկատմամբ, և նրանք պետք է անհապաղ լքեն այն դիրքերը, որոնք այժմ զբաղեցնում են։
Այս մասին լրագրողների հետ ճեպազրույցում ասաց ԱԺ «Իմ քայլը» խմբակցության պատգամավոր Վիկտոր Ենգիբարյանը՝ անդրադառնալով Սյունիքում և Գեղարքունիքում տիրող իրավիճակին և հարցին՝ արդյո՞ք միջազգային հանրության արձագանքները իրավիճակին համահունչ են եղել։
Դիտարկմանը, թե հայաստանյան փորձագիտական շրջանակներում դժգոհություններ կան և՛ ՀԱՊԿ-ից, և՛ ՌԴ-ից, նշվում է, թե վերջիններս անգործության են մատնված, իշխող ուժի ներկայացուցիչն արձագանքեց․
«Հայաստանում պաշտոնական մակարդակով որևէ դժգոհություն չի եղել ո՛չ ՀԱՊԿ-ից, ո՛չ ՌԴ-ից։ Չեմ կարծում, որ բոլոր գործընթացները, բոլոր շփումները, հաղորդակցությունները, որոնք տեղի են ունենում, այնքան հանրամատչելի են, որ միանգամից դրանց վերաբերյալ կարելի է փորձագիտական եզրակացություն կատարել»,-ասաց նա։
Անդրադառնալով ՀԱՊԿ անդամ պետությունների արտաքին գործերի նախարարների նախատեսվող հանդիպմանը՝ Ենգիբարյանն ասաց, թե այն շատ կարևոր է մեզ համար՝ խնդիրը ևս մեկ անգամ ՀԱՊԿ-ի ձևաչափում բարձրաձայնելու իմաստով։ «Բնականաբար ակնկալում ենք, որ էլ ավելի կմեծանա ճնշումը Ադրբեջանի նկատմամբ»,-նշեց նա, ապա հավելեց․
«Ես առաջարկում եմ՝ հարցին նայենք նաև ավելի լայն կոնտեքստում, խոսքը դրվագային, մի քանի հարյուր մետրում որոշ զինվորների տեղակայման մասին չէ, այլ աշխարհաքաղաքական շատ ավելի լայն գործընթացների, որոնք նաև գլոբալ փոփոխությունների արդյունքում են տեղի ունենում, և այս մեծ փոփոխությունների կոնտեքստում մեզ համար կարևոր է կայուն անվտանգային միջավայրի ստեղծումը»։
Հարցին՝ Ֆրանսիայից բացի այլ երկրներից ակնկալո՞ւմ ենք ռազմական օգնություն, պատգամավորն արձագանքեց՝ ռազմական լուծման կողմնակից չեն․ «Մենք հարցին նայում ենք դիվանագիտական ճանապարհով լուծման կոնտեքստում և հույս ունենք, որ հանգուցալուծումն էլ կլինի այդ ձևով։ Բայց, այնուամենայնիվ, եթե դիվանագիտական աշխատանքները չտան հաջողություններ, բնականաբար մենք պատրաստ ենք նաև բոլոր այլ միջոցների, գործիքների կիրառման։ Մենք ողջունում ենք մեզ արված բոլոր առաջարկները, նաև ունենք ռազմական ոլորտի հետ կապված համագործակցության շրջանակներ»,-ասաց նա։
Պատգամավորն ընդգծեց՝ ցանկացած սպառնալիք ՀԱՊԿ անդամ որևէ պետության նկատմամբ՝ սպառնալիք է ՀԱՊԿ անդամ բոլոր պետությունների նկատմամբ․ «Սպասելիքները շատ հստակ են, այս բանաձևի շրջանակներում արդեն պարզ է՝ որոնք են մեր ակնկալիքները։ Բայց կրկնեմ՝ սա ավելի շատ քաղաքական գործընթաց է, ՀԱՊԿ-ի միջամտությունը ևս քաղաքական ու դիվանագիտական գործընթաց է»։
Հարցին՝ իր կարծիքով՝ գործընթացի հապաղում կա՞, պատգամավորը բացասական պատասխան տվեց։
