Հարավային Կորեայի նախագահ Մուն Չժե Ինն այս շաբաթ հնգօրյա ուղևորություն կկատարի ԱՄՆ, որի ընթացքում հանդիպում կունենա Միացյալ Նահանգների նախագահ Ջո Բայդենի հետ, տեղեկացնում է «Արմենպրես»-ը:
Երկու ղեկավարների հանդիպումը կկայանա (տեղական ժամանակով) մայիսի 21-ին, Սպիտակ տանը:
«Բարձր մակարդակով բանակցություններից անմիջապես հետո (երկու ղեկավարները) պլանավորում են համատեղ մամուլի ասուլիս անցկացնել»,-հաղորդել է Մուն Չժե Ինի վարչակազմի՝ հասարակայնության հետ կապերի գծով ավագ քարտուղար Չոն Ման Հոն:
Նա նշել է, որ Հարավային Կորեայի նախագահը պլանավորում է ԱՄՆ-ի մայրաքաղաք ուղևորվել մայիսի 19-ի ցերեկը: Մայիսի 20-ի առավոտյան նա մտադիր է այցելել Առլինգթոնի ազգային գերեզմանատուն: Օրվա երկրորդ կեսին Մուն Չժե Ինը կայցելի Կապիտոլիումի բլուր, որտեղ հանդիպում կունենա Ներկայացուցիչների պալատի խոսնակ Նենսի Փելոսիի հետ: Հաջորդ օրը նախագահը կհանդիպի ԱՄՆ-ի փոխնախագահ Քամալա Հարիսի հետ, որից հետո տեղի կունենան նրա բանակցությունները Ջո Բայդենի հետ:
Հարավային Կորեայի նախագահը պետք է Սեուլ վերադառնա մայիսի 23-ի երեկոյան: Ինչպես հաղորդվել է ավելի վաղ, հանդիպման ընթացքում Մուն Չժե Ինը և Բայդենը կհաստատեն երկու երկրների դաշինքի հաստատունությունը և կքննարկեն մի շարք հարցեր, այդ թվում՝ ԿԺԴՀ-ի միջուկազերծումը:
