Հարբած վիճակում մեքենայի ղեկին նստած բրիտանուհուն «համոզիչ» բացատրության շնորհիվ հաջողվել է խուսափել բանտում հայտնվելուց (լուսանկարներ)
Մեծ Բրիտանիայի մի քաղաքացի, չնայած նրան, որ հարբած վիճակում է մեքենայի ղեկին նստել, հաջողացրել է խուսափել բանտում հայտնվելուց, քանի որ նա ստիպված է եղել նման քայլի դիմել՝ «դաժան» ընկերոջ տված «հրամանի» պատճառով, գրում է Daily Mail-ը:
Նշվում է՝ 33-ամյա Քեթի Մաքֆադենը ձերբակալվել է Մեծ Բրիտանիայի Մեծ Մանչեսթեր նահանգի Ուիթշոու քաղաքում գտնվող իր տան մոտ` 2021 թվականի մարտի 12-ին: Ոստիկանությունը նկատել է, որ մեքենան ճանապարհով ընթացել է անկանոն, մի կողմից մյուս կողմ է տեղաշարժվել:
Փորձաքննությունը ցույց է տվել, որ Մաքֆադդենի արյան մեջ ալկոհոլի քանակը չորս անգամ գերազանցել է թույլատրելի նորմը: Նրան սպառնացել է ազատազրկում, բայց Մանչեսթերի դատարանը կնոջը դատապարտել է ընդամենը 12 ամսվա համայնքային ծառայության և արգելել է մեքենա վարել այդ ժամանակահատվածում:
Բրիտանուհին պատմել է, որ իրեն նման քայլի դիմել է ստիպել իր «դաժան» ընկերը: Մաքֆադենը հավաստիացրել է, որ տղամարդը նստել է ուղևորի նստատեղում, բանալիները նետել նրա մոտ և հրամայել է քշել: Նա ավելացրել է նաև, որ արդեն բաժանվել է իր սիրեցյալից, սակայն նրա անունը չի տվել:
Ոստիկանությունը հաստատել է, որ ուղևորի նստատեղում տղամարդ է եղել: Դատախազ Սթիվ Վուդմանը նշել է, որ կինը կարող էր հեշտությամբ հասնել տուն առանց մեքենա վարելու՝ նույնիսկ այն դեպքում, երբ նրան ստիպել են այդ անել: Այնուամենայնիվ, դատարանը հաշվի է առել ձերբակալվածի զղջումն ու նախկինում ճանապարհային խախտումների բացակայությունը: