საქართველოს ძიუდოისტთა ნაკრებმა პირველი ადგილი დაიკავა ევროპის ჩემპიონატზე
90 კილოგრამ წონით კატეგორიაში ევროკონკურენცია ქართული ფინალით დაგვირგვინდა - ლაშა ბექაურმა ბექა ღვინიაშვილს აჯობა და ევროპის ჩემპიონი გახდა. ღვინიაშვილს ვერცხლი ერგო. 100 კილოგრამშიც ორმა ქართველმა იჭიდავა. ევროპის სამგზის ჩემპიონს - ვარლამ ლიპარტელიანს ერთადერთი ნაბიჯი დააკლდა მეოთხე ტიტულამდე - ფინალში დამარცხდა და ვერცხლის მედალს დასჯერდა. ილია სულამანიძემ კი მეხუთე ადგილი დაიკავა. მძიმე წონაში (+100 კგ) გურამ თუშიშვილი დაეუფლა ბრინჯაოს, ხოლო ლევან მატიაშვილი მეშვიდე პოზიციაზე აღმოჩნდა. დღესვე ჩაერთო საქმეში საქართველოს ქალთა ნაკრების წევრი სოფიო სომხიშვილი (+78), მაგრამ ევროპირველობას საწყისი ეტაპიდან გამოეთიშა.
საქართველოს ნაკრებმა მამაკაცთა ორმოცდაოთხ ნაკრებს შორის პირველი ადგილი დაიკავა საერთო გუნდურ ჩათვლაში.