პარტია „მოქალაქეების“ ლიდერის, ალექსანდრე ელისაშვილის განცხადებით, ევროკავშირის წარმომადგენლობის ოფისში გამართულ შეხვედრაზე მკაფიოდ ითქვა, რომ ევროპული საბჭოს პრეზიდენტმა შარლ მიშელმა პოლიტიკურ პარტიებს შესთავაზა დოკუმენტი, რომელიც შინაარსობრივად და არსებითად აღარ შეიცვლება.
„შეხვედრაზე ძალიან მკაფიოდ გვითხრეს, ესაა საბოლოო დოკუმენტი პრეზიდენტ მიშელის მიერ მოლაპარაკების მაგიდაზე დადებული, რომელშიც ძალიან მცირე სარედაქციო ცვლილებები შეიძლება, შევიდეს, მაგრამ შინაარსობრივად და არსებითად ტექსტი არ შეიცვლება. აქაა საუბარი, რომ ვადამდელი არჩევნები დაინიშნება, თუ „ქართული ოცნება“ ოქტომბერში პროპორციულ წესში 43 პროცენტზე მეტს ვერ აიღებს. აქ რურუას და მელიას გათავისუფლების ძალიან კონკრეტული მექანიზმებია. აქაა ძალიან სერიოზული ჩანაწერები მართლმსაჯულების რეფორმასთან დაკავშირებით. რაც განსაკუთრებით მნიშვნელოვანია, საარჩევნო რეფორმასთან და ხუთ კომიტეტთან დაკავშირებით, რომელიც ოპოზიციის წარმომადგენლება უნდა დაიკავონ“, - განაცხადა პარტია „მოქალაქეების“ ლიდერმა, ალეკო ელისაშვილმა ევროკავშირის წარმომადგენლობაში გამართული შეხვედრის დასრულების შემდეგ.
ალექსანდრე ელისაშვილი მიიჩნევს, რომ ოპოზიციისთვის გადაცემული დოკუმენტი „საბოლოო დოკუმენტია“,
„ამას ვინც ხელს არ მოაწერს, იმას არც ეს ქვეყანა და ხალხი ადარდებს, რომელიც სიღატაკეში იხრჩობა. ჩვენ ამ დოკუმენტს ხელს ვაწერთ, ისედაც პარლამენტში ვართ შესულები. უცნაურია, რომ „ქართული ოცნება“ არ იყო წარმოდგენილი. საინტერესოა, ხალხმა ნახოს, ვისაც ეს ქვეყანა და ხალხი ადარდებს, ის ამ დოკუმენტს ხელს მოაწერს“, – განაცხადა ალექსაკნდრე ელისაშვილმა.
