МЗС Расеі абвясціла аб мерах у адказ на санкцыі ЗША
МЗС Расеі паведаміла, што ўвядзе контрмеры ў адказ на новыя санкцыі ЗША. У паведамленні на сайце міністэрства сказана, што:
– з Расеі вышлюць 10 амерыканскіх дыпламатаў;
– у Расею ў кароткатэрміновыя паездкі змогуць ездзіць не больш за 10 амерыканскіх дыпламатаў у год;
– у дыпмісіі ЗША забароняць наймаць у якасці адміністрацыйна-тэхнічных работнікаў грамадзян РФ і трэціх краін;
– спыніць дзеянне двухбаковы мемарандум 1992 года „Аб разуменні ў дачыненні да „адкрытай сушы”»;
– у Расеі спыняць працу амерыканскія фонды і няўрадавыя арганізацыі, падкантрольныя Дзярждэпартаменту і іншым амерыканскім дзяржструктурам.
Таксама ў МЗС лічаць, што паслы ЗША і Расеі павінны знаходзіцца ў сваіх сталіцах «для аналізу сітуацыі і правядзення кансультацый». У міністэрстве паабяцалі закрыць уезд у Расею для васьмі дзеючых і былых амерыканскіх чыноўнікаў і дзеячаў, «якія маюць дачыненне да распрацоўкі і рэалізацыі антырасейскага курсу». Іх імёны МЗС абяцае раскрыць пазней.
У міністэрстве адзначылі, што ў адказ на высылку трох расейскіх дыпламатаў з Польшчы з Расеі вышлюць пяць польскіх дыпламатаў.
У МЗС заклікалі ЗША «прадэманстраваць разважлівасць, адмовіўшыся ад канфрантацыйнага курсу», у адваротным выпадку расейскія ўлады пагражаюць скараціць колькасць персаналу амерыканскіх дыпмісій у Расеі да 300 чалавек.