„У той час як у працы Пастаяннага савета [АБСЕ] быў перапынак, на жаль, у Беларусі не было перапынку ва ўжыванні рэпрэсій”, — заявіла в.а. намесніка кіраўніка місіі ЗША ў арганізацыі Элізабет Разенсток-Сілер 16 красавіка на пасяджэнні Пастаяннага савета АБСЕ ў Вене.
„Мы асабліва занепакоеныя правакацыйнымі, палітычна матываванымі арыштамі ўладамі членаў беларуска-польскай супольнасці, — сказала яна. — Гэтыя арышты суправаджаліся яшчэ больш лютай антыпольскай прапагандай па беларускім дзяржаўным тэлебачанні, а таксама націскам на школы польскай мовы з мэтай атрымання падрабязнай інфармацыі аб іх настаўніках і вучнях (у тым ліку аб непаўналетніх)”.
Разенсток-Сілер таксама адзначыла: „Мы нагадваем нашым беларускім калегам, што іх грамадзяне, у тым ліку і польскага паходжання, не з’яўляюцца іх ворагамі. Мы заклікаем беларускія ўлады не ставіцца да сваіх грамадзян як да праціўнікаў, а замест гэтага паважаць іх правы чалавека і асноўныя свабоды”.
Прадстаўнік ЗША падкрэсліла, што рэпрэсіі, якія падтрымліваюцца беларускай дзяржавай у дачыненні да чальцоў польскай супольнасці, суправаджаюцца ўшчамленнем правоў на свабоду выказвання думак, мірных сходаў і аб’яднанняў. „Мы падтрымліваем намаганні Міжнароднай платформы падсправаздачнасці па Беларусі па зборы доказаў катаванняў і рэпрэсій для прыцягнення вінаватых да адказнасці”, — заявіла Разенсток-Сілер.
