აქტივისტმა გიორგი მუმლაძემ საპატიმრო დატოვა

სამოქალაქო აქტივისტმა, გიორგი მუმლაძემ საპატიმრო დატოვა. ინფორმაციას და მასთან ერთად გადაღებულ ფოტომასალას "მოძრაობა საქართველოსთვის" წევრი, ლაშა ხუსკივაძე ავრცელებს.


მუმლაძეს დღეს თბილისის საქალაქო სასამართლომ აღკვეთის ღონისძიების სახით 3000 ლარის გადახდა დააკისრა. მოსამართლის გადაწყვეტილებით, მუმლაძეს საპატიმროს დატოვება 1500 ლარის გადახდის შემდეგ უკვე შეეძლო. რადიო თავისუფლებას ლაშა ხუსკივაძემ უთხრა, რომ დაკავებულის გირაო სრულად არის დაფარული.




გიორგი მუმლაძე სხვა 4 აქტივისტთან ერთად პარტია "ქართული ოცნების" ოფისთან 14 აპრილს დააკავეს, როცა ის გალში მცხოვრები საქართველოს მოქალაქეებისთვის 5-დღიანი სავალდებულო კარანტინის გაუქმებას ითხოვდა. დავით კაპანაძე და სხვა აქტივისტები კი - ამავე დღის მეორე ნახევარში, შინაგან საქმეთა სამინისტროში, სადაც აპროტესტებდნენ იმას, რომ მუმლაძეს ბრალი სისხლის სამართლის კოდექსით გათვალისწინებულ დანაშაულში დასდეს, რაც 3-დან 5 წლამდე პატიმრობას ითვალისწინებს. აქტივისტებს პოლიცია, როგორც წესი, ადმინისტრაციული კოდექსის დარღვევის გამო აკავებს ან აჯარიმებს.


მუმლაძის წინააღმდეგ გამოძიება სისხლის სამართლის კოდექსის 353-ე მუხლის პირველი ნაწილით მიმდინარეობს, რაც პოლიციის თანამშრომლებისთვის წინააღმდეგობის გაწევას გულისხმობს.