ჩიკაგოს ხელისუფლებამ, საზოგადოებრივი პროტესტის საპასუხოდ, 15 აპრილს გამოაქვეყნა პოლიციელის სამკერდე კამერით გადაღებული ვიდეოჩანაწერი, სადაც აშკარად ჩანს, როგორ მისდევს ქუჩაში პოლიციელი 13 წლის ბიჭს და შემდეგ ესვრის მას.
ვიდეოზე ჩანს, რომ ბიჭმა დააგდო პისტოლეტი და ხელების აწევა დაიწყო, როცა სასიკვდილო გასროლა მოხდა. ვიდეოჩანაწერში მოჩანს, რომ ერიკ სტილმანი მისდევს ადამ ტოლედოს Little Village-ში, მექსიკურ უბანში, ჩიკაგოს West Side-ის რაიონში. ინციდენტი მოხდა 29 მარტს.
ჩანაწერში ისმის, როგორ უბრძანებს სტილმანი ტოლედოს, რომ გაჩერდეს და ხელები ასწიოს, რასაც, როგორც ჩანს, ტოლედო აკეთებს კიდეც იმ მომენტამდე, სანამ სტილმანი ბიჭს ერთხელ გასროლით მოარტყამს ტყვიას მკერდში.
მერმა ლორი ლაითფუტმა განაცხადა, რომ ვიდეომასალა მძიმე საყურებელი იყო, თუმცა მოსახლეობას სთხოვა, თავი შეეკავებინათ განსჯისგან.
ზოგიერთმა ფირმამ ჩიკაგოში ფანჯრებზე ფიცრები ააკრა იმის მოლოდინით, რომ პროტესტი და მღელვარება შეიძლებოდა დაწყებულიყო. საპროტესტოდ გამოსულებმა მშვიდობიანად ჩაიარეს ჩიკაგოს ცენტრის მთავარ ქუჩაზე და გამოაცხადეს, რომ დაგეგმილი აქვთ უფრო მასშტაბური დემონსტრაცია 16 აპრილს.
ვიდეო გამოქვეყნდა მაშინ, როცა შეერთებული შტატებში, მინეაპოლისში, მიმდინარეობს პოლიციის თანამშრომლის სასამართლო პროცესი. მას აფრიკელ-ამერიკელი ჯორჯ ფლოიდის მკვლელობა ედება ბრალად. პოლიციის ყოფილი თანამშრომლის, დერეკ შოვინის საქმეზე, სასამართლოზე, სავარაუდოდ, მომავალ კვირაში ჟიური გამოთქვამს თავის შეფასებებს.
