«Юксалиш» умуммиллий ҳаракати ҳамда «Сабр» Республика ижтимоий-иқтисодий ривожланиш маркази, Республика «Istiqbolli avlod» ижтимоий-ахборот маркази билан ҳамкорликда Европа Иттифоқининг молиявий кўмагида «COVID-19 пандемиясининг Ўзбекистон фуқаролик жамиятига таъсирини камайтириш дастури» лойиҳасини ишга туширмоқда. Лойиҳа мамлакатимиз ҳукуматига кўмаклашишга қаратилган. Лойиҳа ташаббускорлари жорий йилнинг 16 апрель куни бўлиб ўтган миллий маслаҳат учрашувида Европа Иттифоқи томонидан қўллаб-қувватланаётган «COVID-19 пандемиясининг Ўзбекистон фуқаролик жамиятига таъсирини камайтиришга кўмаклашиш» дастури ҳақида маълум қилган эди. «Халқаро молия институтлари ташқи савдо ва ички иқтисодий таъсирларнинг қисқариши туфайли Ўзбекистонда ўсиш суръати тахминан 1,5 фоизгача пасайишини тахмин қилишган. Пандемия бозор иқтисодиётига ўтиш, хусусий секторларнинг ўсиши ва хорижий инвестицияларни жалб қилишда эришилган ютуқларга салбий таъсир кўрсатди. Коронавирус инфекцияси тарқалиши туфайли ишсизлар сони сезиларли даражада ошди. Пандемия сабабли аҳолининг заиф қатламлари янада заифлашиш, ривожланаётган мамлакатлар ва уюшмалар эса ўсишдан ортда қолиш хавфи остида. Мамлакатга қайтаётган меҳнат мигрантлари сонининг ошиши ҳам давлатнинг ижтимоий ҳимоя ва соғлиқни сақлаш тизимига оғирлик қилади. Пандемия туфайли жорий қилинган ижтимоий масофани чеклаш чоралари ногиронлиги бўлган шахсларнинг уйида бўлиб турган ҳолда доимий ёрдам олиш имкониятларини чеклади. Вируснинг тарқалиши ногиронлиги бўлган шахсларнинг изоляцияда қолишини янада кучайтирди, тизимдаги бўшлиқларни ва атроф-муҳит (шифохоналар, уй хўжаликлари, карантин муассасалари ва бошқаларни)га тўсиқларни келтириб чиқарди. Европа Иттифоқининг мазкур дастури гуманитар, тиббий, ижтимоий ва иқтисодий инқироз оқибатларини бартараф этишга қаратилган. Лойиҳа қисқа муддатли эҳтиёжларни ҳамда жамият ва иқтисодиётга янада узоқроқ муддатли таркибий таъсирларни назарда тутади, бу билан нотурғунлик хавфини камайтиради. У ҳам давлат, ҳам нодавлат ташкилотлари фаолиятини кучайтиришга йўналтирилган», дейилади «Юксалиш» ҳаракати матбуот хизмати хабарида. Дастур доирасида 18 ой давомида Андижон, Самарқанд, Қашқадарё ва Тошкент вилоятларининг олис қишлоқ ҳудудларида аҳолининг эҳтиёжманд қатламларини аниқлашга, моддий ва номоддий ёрдам кўрсатишга кўмаклашиш режалаштирилган. Хусусан, учта нодавлат нотижорат ташкилоти томонидан амалга ошириладиган лойиҳалар қуйидагиларга қаратилади: – 350та оилага 3,5 млн сўмдан пул маблағи ажратиш (жами 1,3 млрд сўм); – 185та стартап лойиҳаларга грант ажратиш (жами 3 млрд сўм); – 12та тиббиёт муассасаларини жиҳозлаш (жами 1,5 млрд сўм); – 400 нафар меҳнат мигрантларига кўмаклашиш (жами 800 млн сўм); – 12та олис қишлоқ ҳудудларида кичик инфратузилмани яхшилаш; – «Темир», «Аёллар» ва «Ёшлар» дафтарларига киритилган 2 000 нафар фуқароларни тадбиркорликка жалб этиш бўйича тренинглар ташкил этиш; – 900 нафар Халқ қабулхоналари ва маҳалла тизими вакиллари, профилактика инспекторларининг малакасини ошириш.
