АҚШ 2017 йилдан буён Эронга қарши киритган барча санкцияларини бекор қилишга тайёр эмас, деб таъкидлади Давлат департаменти вакили журналистларга. Бу ҳақда «Интерфакс»хабар берди.
Венада Эрон ядро дастури бўйича Қўшма ҳаракатлар режаси (ҚҲР) шу ҳафта ўз ишини қайта бошлади. Асосий масала АҚШни ҚҲРга қайтариш учун амалга оширилиши мумкин бўлган чораларни ишлаб чиқиш ҳисобланади. Маълумот учун, 2018 йилда собиқ давлат раҳбари Дональд Трампнинг ташаббуси билан АҚШ ҚҲРдан чиқиб кетган эди.
Эрон барча санкцияларнинг бекор қилинишини даъво қилмоқда, шунингдек, ҳукумат биринчи қадамни АҚШ қўйиши керак, деб ҳисоблайди. АҚШ расмийлари эса Теҳроннинг ҚҲР шартларига тўлиқ риоя қилишини талаб қиляпти.
Комиссия ишида Эрон, Россия, Хитой, Франция, Германия ва Буюк Британия давлатлари иштирок этмоқда. АҚШ эса бу ишда қатнашмаяпти, лекин ҳукумат делегацияси келишув аъзоларининг баъзилари билан норасмий учрашув ўтказиш учун Венага келди. Эрон делегацияси билан учрашиш режалаштирилмаган.
Давлат департаменти вакили, АҚШ «Эроннинг ҚҲРни қайта тиклашга жиддий киришганининг баъзи аломатлари»ни кўрганини, лекин бу «етарли эмас»лигини айтди. Шунингдек, у Эроннинг барча санкцияларни бекор қилиш талаби иложсизлигини таъкидлади.
«Агар Эрон 2017 йилдан буён киритилган барча санкцияларнинг бекор қилиниши бўйича ўз талабида қатъий туриб олса, ё ҳеч қандай келишув бўлмайди, ё биз боши берк кўчага кириб қоламиз», — деди дипломат.
Унинг аниқлик киритишича, музокараларда санкцияларни бекор қилиш бўйича аниқ ҳаракатлар эмас, балки фақат Эрон ва АҚШнинг бажариши керак бўлган «ҳаракатлар мажмуаси» муҳокама қилинмоқда.
Брюсселда чоп этилган Европа ташқи сиёсий хизматининг (EТCX) пресс-релизида ёзилишича, 9 апрель куни якунланган комиссия мажлиси «ижобий ҳолатни сақлаб қолиш учун, келаётган ҳафтада яна ўтказилади».
«ҚҲР аъзолари сўнгги уч кун ичида мутахассислар томонидан бажарилган ишларни сарҳисоб қилди ва олинган дастлабки натижаларни мамнуният билан тақдим этди», — деб ёзди БМТ қошидаги Атом энергияси халқаро агентлигининг Россиядаги доимий вакили Михаил Улянов ўзининг Twitter саҳифасида.
