Մենք ընտանիքով ենք պայքարում, իմ 5 եղբայրների հետ եմ պայքարել 90-ականներին, իմ 7 երեխայով եմ պայքարել այս կռիվներին, այն ժամանակ եղբայր եմ կորցրել, հիմա երեխա եմ կորցրել, ամեն ինչ եմ կորցրել: Հիմա ման եմ գալիս մեղավորներին, չգիտեմ՝ ովքեր են: Այս մասին Բաղրամյան պողոտայում Tert.am-ի հետ զրույցում ասաց Արցախից եկած քաղաքացին:
«Մնացել եմ առանց ոչնչի: Արցախի Շեխեր գյուղից եմ, այնտեղի գինու գործարանն էլ է իմը եղել, կորցրել եմ, թուրքերը մեջն են: Կորցրել եմ ամեն ինչ, կորցրել եմ ամենահարազատիս, թափառում եմ, երբ ուզում է՝ լինի, գտնելու եմ մեղավորներին»,-ասաց նա՝ նշելով, թե բանակի կողքին է:
«Եթե չկա բանակ, չկա նաև ազգ: Ես միանշանակ բանակի կողքին եմ, ինչ էլ լինի: Ես չեմ հիշում, որ նախկինում ազգն այսքան տուժած լիներ, չունենային տուն, այն ժամանակ այնքան տներ կային, խնդրում էին՝ ապրեին մարդիկ, հիմա անտուն են մնացել»,-ասաց քաղաքացին:
