Ստամբուլում Սաուդյան Արաբիայի գլխավոր հյուպատոսությունում սպանված սաուդացի ընդդիմադիր լրագրող Ջամալ Խաշոգջիի հարսնացուն՝ Խաթիջե Ջենգիզը, կոչ է արել պատժել սաուդյան թագաժառանգ Մուհամմադ բին Սալմանին այն բանից հետո, երբ Միացյալ Նահանգների կողմից հրապարակվել է զեկույց, որում նշված էր միջադեպին թագաժառանգի մասնակցությունը:
Այս մասին հայտնում է «ՌԻԱ Նովոստի» լրատվական գործակալությունը։
Ավելի վաղ հաղորդվել էր, որ ԱՄՆ ազգային հետախուզության տնօրենի գրասենյակը կարծում է, որ Սաուդյան Արաբիայի թագաժառանգ արքայազն Մուհամմադ բին Սալմանն անձամբ է հաստատել Խաշոգջիի սպանությունը: ԱՄՆ նախագահ Ջո Բայդենն ասել է, որ Սաուդյան Արաբիայի թագավորին խոստանում է «նոր փոփոխություններ» կատարել Միացյալ Նահանգների քաղաքականության մեջ: Սաուդյան Արաբիայի իշխանությունները մերժել են ԱՄՆ հետախուզության զեկույցի եզրակացությունը՝ նշելով, որ «զեկույցը ոչ ճիշտ տեղեկություններ է պարունակում»: Հայտարարության համաձայն՝ երկրի իշխանությունները հանցագործություն կատարած անձանց դեմ արդեն իսկ անհրաժեշտ միջոցներ են ձեռնարկել:
«Ողջունում եմ զեկույցը։ Ճշմարտությունը կրկին հաստատվեց, սակայն դա բավարար չէ։ Թագաժառանգն այլևս իրավասություններ չունի, ժամանակն է դա գիտակցել և պատժել նրան՝ առանձնակի դաժանության սպանության հրաման տալու համար», – իր թվիթերյան էջում գրել է Խաթիջե Ջենգիզը։
Ըստ նրա՝ թագաժառանգին պատժելը կօգնի կանխել նման հանցագործություններն ապագայում․ «Եթե սպանությունն անպատիժ մնա, այն սև կետ կդառնա ողջ մարդկության համար»։
Հիշեցնենք, որ ընդդիմադիր լրագրողն անհետացել էր Ստամբուլում Սաուդյան Արաբիայի հյուպատոսություն մուտք գործելուց հետո: Թուրքական ոստիկանությունը պնդում էր, որ լրագրողը սպանվել է Ստամբուլում Սաուդյան Արաբիայի հյուպատոսության շենքի ներսում: Մինչդեռ հյուպատոսարանից հայտնում էին, թե Խաշոգջին կորել է հյուպատոսության շենքից դուրս գալուց հետո: Ավելի ուշ Սաուդյան Արաբիան խոստովանել էր, որ լրագրողը սպանվել է, ըստ նրանց՝ դա տեղի է ունեցել հյուպատոսության ներսում ծագած վեճի հետևանքով:
