«Առողջապահության նախարարության մատուցմամբ կառավարության ապօրինությունների շղթան ընդհատվեց: Այս մասին հայտարարություն է տարածել Արժանապատիվ բուժաշխատողների միությունը:
«Այսօր Ազգային ժողովում քննարկվեցին կառավարության կողմից ներկայացված «Մարդու իմունային անբավարարության վիրուսից առաջացած հիվանդության կանխարգելման մասին» Հայաստանի Հանրապետության օրենքում փոփոխություններ և լրացում կատարելու մասին և ՀՀ քրեական օրենսգրքում փոփոխություն կատարելու մասին օրենսդրական նախագծերը։
ԱԺ պատգամավորների մեծամասնությունը չտրվեց առողջապահության նախարարի առաջին տեղակալի պաշտոնը զբաղեցնող անձի մանիպուլյացիաներին, հանրությանը և Ազգային ժողովին մոլորության մեջ գցելու փորձերին։
Ձայների մեծամասնությամբ՝ դեմ-47, կողմ-46, ձեռնպահ-10, կառավարության կողմից ներկայացված նախագծերը չընդունվեցին։
Առողջապահության նախարարության մատուցմամբ կառավարության ապօրինի որոշմամբ ՁԻԱՀ-ի կանխարգելման հանրապետական կետրոնի վերակազմավորման պոստ ֆակտում լեգիտիմացման փորձը տապալվեց։
Տապալվեցին նաև Օրենքում և Քրեական օրենսգրքում մի շարք այլ աղմկահարույց դրույթների ու ականների ներմուծման քողարկված փորձերը, որոնք բացահայտվեցին մի խումբ պատգամավորների կողմից։
Հղումով ներկայացված են նշված նախագծերի վերաբերյալ ԱԺ պատգամավորների քվեարկության արդյունքները»:
