გერმანიამ გადაწყვიტა, 7 მარტამდე გააგრძელოს მკაცრი ლოკდაუნი, რომელიც ქვეყანაში დეკემბრის შუა რიცხვებში შემოიღეს კორონავირუსის ინფექციის მკვეთრი ზრდის ფონზე.
ლოკდაუნის გაგრძელების შესახებ შეთანხმდნენ ვიდეოკონფერენციაზე, რომელიც კანცლერმა ანგელა მერკელმა გამართა გერმანიის ფედერალურ მხარეთა პრემიერ-მინისტრებთან.
იტყობინებიან, რომ რეჟიმის გაგრძელებას ითხოვდა ფედერალური კანცლერის უწყება, მიუხედავად ზოგიერთი რეგიონული ხელისუფლების წინააღმდეგობისა. კანცლერის უწყებამ მოიშველია საფრთხე, რომელიც დაკავშირებულია კორონავირუსის ახალი, უფრო სახიფათო მუტაციების გავრცელებასთან.
გფრ-ში კვლავაც დაკეტილი იქნება სასტუმროები, რესტორნები და კაფეები, თეატრები და კინოთეატრები, ფიტნეს-სტუდიები, საცალო ვაჭრობის საწარმოები, სასურსათო მაღაზიებისა და აფთიაქების გამოკლებით. ამასთან, დამტკიცებული ზომები მთელ რიგ გამონაკლისებს ითვალისწინებს. 1 მარტიდან ნებადართულია საპარიკმახეროების მუშაობა.
„ამოსავალი პრინციპი - „ვრჩებით სახლში“ - კვლავაც მნიშვნელოვანი იარაღია პანდემიის წინააღმდეგ საბრძოლველად“, ნათქვამია დოკუმენტში, რომელიც ვიდეოკონფერენციის დროს მიიღეს 10 თებერვალს.
პანდემიის დაწყებიდან გერმანიაში COVID-19-ით გარდაიცვალა 63 ათასი ადამიანი. უკანასკნელ ხანებში შემცირდა დღე-ღამეში ინფიცირებულთა რიცხვი. ოთხშაბათს გერმანიაში კორონავირუსით ინფიცირების 8 ათასამდე ახალი შემთხვევა დადასტურდა.