АҚШ президенти Жо Байден Пентагонга Хитой борасидаги ҳарбий сиёсатни зудлик билан қайта кўриб чиқишга кўрсатма берди.
Мудофаа вазирлигига 10 февраль куни ташриф қилган Байден бу қайта таҳлил АҚШга Хитой борасидаги масалаларда “шахдам қадамларни белгилаб олишга” ёрдам беришини айтди.
"Глобал ҳамда Ҳинд-Тинч океани миқёсидаги манфаатларимизни ҳимоя қилиш, дунёда тинчликни сақлаш йўлида биз Хитой таҳдидларига муносиб жавоб беришимиз лозим”, - деди АҚШ президенти.
Таҳлил доирасида разведка, технологиялар, минтақадаги АҚШ базалари, иттифоқлари ҳамда Пекин билан икки томонлама мудофаа алоқалари каби муҳим масалалар қайта кўриб чиқилади.
Жо Байденнинг президент сифатида Пентагонга илк ташрифи давомида унга мудофаа вазири Ллойд Аустин ҳамроҳлик қилган. Аустиннинг Байденга билдиришича, Хитой борасидаги ҳарбий стратегияни қайта кўриб чиқиш учун янги ишчи гуруҳи тузилган.
Ишчи гуруҳ тўрт ой ичида ўз мулоҳазалари ва тавсияларини тақдим этиши лозим. Пентагон таҳлилини иккала сиёсий партия, АҚШ иттифоқчилари ва бошқа ҳамкорлари қўллаб-қувватлаши лозим, деб ҳисоблайди Жо Байден.
