Толибон делегацияси Туркманистон Ташқи ишлар вазирлиги ходимлари билан учрашди. Учрашув давомида тарафлар Туркманистон – Афғонистон – Покистон – Ҳиндистон (ТАПҲ) газ қувури лойиҳаси билан боғлиқ хавфсизлик масалаларини муҳокама қилган.
Толибоннинг Қатардаги ваколатхонаси раҳбари Наим Бардакнинг сўзларига кўра, музокараларда Туркманистон бош вазирининг ўринбосари ва ташқи ишлар вазири иштирок этган.
Туркманистон ҳукумати эълон қилган баёнотда ёзилишича, учрашув давомида Афғонистонда тинчлик ва барқарорлик ўрнатиш масаласи муҳокама қилинган.
Баёнотда айтилишича, Толибон вакиллари Туркманистоннинг инфратузилма лойиҳаларини тўлиқ қўллаб-қувватлашларини изҳор қилишган.
Туркманистондаги давлат оммавий ахборот воситалари учрашув ҳақида хабар бермади. Афғонистон ҳукумати эса Ашхободда бўлиб ўтган музокараларга ҳали изоҳ бергани йўқ.
ТАПҲ қувури орқали Туркманистондан Ҳиндистонга газ етказиб бериш режалаштирилган. Ушбу қувурнинг узунлиги 1 814 км, қиймати эса 10 миллиард долларни ташкил этади.