Avropa tibbiy agentligi Moderna şirketi yapqan COVID-19 aşısını qullanmağa tevsiye ete. Bu aqta müessiseniñ resmiy haberinde aytıla, dep yaza Azatlıq Radiosı.
Bu, BioNTech-Pfizer aşısından soñ Avropa tibbiy agentliginiñ tevsiyesini alğan ekinci koronavirus aşısıdır. Avropa Birliginde mezkür koronavirus aşısı yapılıp başlandı.
Aşı Avropa Birligi akimiyeti tarafından tasdıqlanmalı. Avropa komissiyasınıñ yolbaşçısı Ursula Gertrud von der Leyenniñ aytqanına köre, ad-azırda Avropa komissiyası «bu qararnı tasdıqlamaq ve aşını bütün Avropa Birligi içün açıq yapmaq içün çalışa».
Klinik sınavlar aşınıñ 18 yaştan büyük insanlarğa kelişkenini kösterdi, dep aytıla Agentlik hulâsasında. Sınavda tahminen 30 biñ göñülli iştirak etti. Semereligi 94 fayız oldı, ölümge yol bermeme ceetinden – 100 fayız,
Aşı eki kere qoldan 28 kün aranen yapılmalı. Eñ çoq körüngen yan tarafları – ine urulğan yeriniñ şişmesi, baş ağrısı, adale ağrısı, oqşuv, alsızlıq, sıcaq çıqması ve ahlat tüyümleriniñ qabarması. Bu yan tesirler bir qaç künde keçe.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
