"Ювентус" бош мураббийи Андреа Пирло А Серия доирасида "Милан"га қарши ўйиндан олдинги фикрлари билан ўртоқлашди. "Милан" - мен жуда кўп ўйнаган ва кўплаб ғалабаларга эришган жамоам. Гарчи клубда катта ўзгаришлар бўлган бўлса-да, бу ўйин мен учун муҳим аҳамият касб этади. Мен билганлардан фақатгина Мальдини қолган. "Милан" билан илк марта мураббий сифатида рақиб бўлаётганим ўзгача ҳиссиётлар тақдим қилади. Ҳа, ўйин жуда муҳим, бироқ ҳеч нимани ҳал қилмайди. "Милан" ва "Ювентус" ўртасидаги ўйинлар доим ўзгача ўтиб келган. Футболчи сифатида доим бундан завқ олганман, энди мураббийликда ҳам шундай бўлади. Натижа учун боримизни берамиз", - деди Пирло.
