Qurban Qurbanov: Getdikcə oyunçularımdan daha çoxunu tələb edəcəyəm
Qarabağ`ın baş məşqçisi Qurban Qurbanov Azərbaycan Premyer Liqasının X turunda evdə Sumqayıt`ı 6:1 hesabı ilə məğlub etdikləri oyundan sonra keçirilən mətbuat konfransında danışıb.
ONBİR 48 yaşlı mütəxəssisin açıqlamalarını təqdim edir:
“Vacib oyun idi. Liderə qarşı oynayırdıq. Bizi yalnız qələbə liderliyə yüksəldə bilərdi. Şükürlər olsun, hər şey istədiyimiz kimi alındı. Futbolçularımı təbrik edirəm. Xüsusilə oyun nizam-intizamından razı qaldım.
Futbolda belə oyunlar olur. Ola bilər, futbolçulardan daha çox hücum etməyi və qol vurmağı tələb edirik. Əvvəllər bu, bizdə alınmırdı. Getdikcə futbolçularımdan daha çoxunu tələb edəcəyəm. Hazırkı vəziyyəti qorumalıyıq.
Rahillə Maksim ölkə xaricindədir. Yalnız test nəticələrindən sonra qayıda bilərlər. Rahildə yaxşılaşma var. Maksimdə isə simptomlar davam edir. Bir az gözləməliyik. Abbas və Patrik bu ayın sonunadək oynamayacaq. Ozobiç isə zədə səbəbindən meydana çıxa bilməyəcək.
Bütün xalqımı təbrik edirəm. Ağdam rəsmən bizə qayıtdı. Artıq qaçqın komandası yoxdur. Yenidən orada oynayacaq, oradakı hissləri yaşayacağıq. Bizə bu günləri yaşadan hər kəsə təşəkkür edirəm. Ümid edirəm ki, bundan sonra xalqımız daha da birləşəcək”.
(Sport24.az)
The post Qurban Qurbanov: Getdikcə oyunçularımdan daha çoxunu tələb edəcəyəm appeared first on ONBİR.