ბაქოში სისხლის სამართლის საქმე აღძრეს აფხაზეთიდან ყარაბაღში ჩასული მოხალისეების წინააღმდეგ
პრესრელიზში მითითებულია, რომ ადამიანების ჯგუფმა, „რომელიც საქართველოში აფხაზეთის ტერიტორიაზე ცხოვრობს“, ბოროტმოქმედებები ჩაიდინა აზერბაიჯანის წინააღმდეგ.
„ჩატარებული გამოძიებით დაგინდა, რომ აფხაზეთში მცხოვრებმა სეირან კოჯამანიანმა, გალუსტ ტრაპიზონიანმა და სხვებმა 2020 წლის ოქტომბერში მოახდინეს 20-ზე მეტი პირისგან შემდგარი ჯგუფის მობილიზება, რომლებმაც გამოგონილი ‘მთიანი ყარაბაღის’ რეჟიმის ხელმძღვანელობასთან ჩაატარეს შეხვედრა, რომელზეც ისაუბრეს სამხედრო ოპერაციებში მონაწილეობის შესახებ. დანაშაულებრივი გაერთიანების ზემოთჩამოთვლილი წევრები, სახელმწიფო სტრუქტურების ხელშეწყობით სომხეთში ჩასვლის შემდეგ, დანაშაულებრივ კავშირში შევიდნენ პირებთან, რომლებიც აზერბაიჯანის ოკუპირებულ ტერიტორიებზე იმყოფებოდნენ, და მათთან დანაშაულებრივ ჯგუფში გაერთიანების შემდეგ მათ აუცილებელი დოკუმენტების გარეშე, უკანონოდ გადაკვეთეს აზერბაიჯანის სახელმწიფო საზღვარი, საკონტროლო-გამშვები პუნქტების გვერდის ავლით ანუ სომხეთიდან, და შეაღწიეს ქალაქ ხანკენდიში და სხვა ოკუპირებულ ტერიტორიებზე. დადგინდა, რომ ისინი სომხეთის სამხედრო-პოლიტიკური რეჟიმის მიერ გამოიყენებოდნენ დაქირავებულების როლში სამოქალაქო მოსახლეობისა და ანტიტერორისტულ ოპერაციაში მონაწილე აზერბაიჯანის ძალების წინააღმდეგ“, ნათქვამია განცხადებაში.
ბაქოში აცხადებენ, რომ „დანაშაულებრივი დაჯგუფების წევრები“ საბრძოლო მასალისა და სამხედრო ტექნიკის გამოყენებით სჩადიოდნენ დანაშაულებებს მშვიდობიანი მოსახლეობის წინააღმდეგ, რომელიც არ მონაწილეობდა საბრძოლო ოპერაციებში.
სისხლის სამართლის საქმე აღძრულია აზერბაიჯანის სისხლის სამართლის კოდექსის რამდენიმე მუხლით, რომლებიც ითვალისწინებს თავისუფლების აღკვეთას 12-დან 20 წლამდე.
გამოძიების ჩატარება გენერალური პროკურატურის საგამოძიებო სამმართველოს დაევალა.
ყარაბაღში აფხაზეთიდან მოხალისეთა ჯგუფის გაგზავნის შესახებ ცნობილი გახდა 6 ნოემბერს. აფხაზეთის სომხური სათვისტომოს თავმჯდომარემ, გალუსტ ტრაპიზონიანმა „ეხო კავკაზას“ განუცხადა, რომ „მათ ერთი დღე მოასწრეს ამ მოვლენებში მონაწილეობა,“ რის შემდეგაც ხელმოწერილ იქნა სამმხრივი სამშვიდობო განცხადება ომის შეწყვეტის შესახებ.