Keçken künü Qırımda 6 hasta koronavirus yuqunçından vefat etti, dep aytıla Qırımnıñ Rusiye sağlıq nazirliginiñ er künlik monitoring malümatında. Böylece, Qırım akimiyetiniñ statistikasına köre, Qırımda pandemiya vaqtında COVID-19-dan vefat etken hastalarnıñ sayısı 194 oldı.
«2503 insan ambulator tedaviylevde buluna, 2389 kişi hastahanelerde koronavirus ve pnevmoniyadan tedaviylene, 82 insan observatorlarğa alındı. Umumen 11584 COVID-19 hastası qayd etildi. 7406 kişi tüzelgen soñ hastahaneden çıqarıldı», – dep aytıla müessise haberinde.
Keçken künü Qırımda 220 koronavirus hastası qayd etildi. Qırımda pandemiya vaqtında 7406 insan tüzeldi.
Qırım ve Aqyardaki Rospotrebnadzor idaresiniñ yolbaşçısı Natalya Penkovskaya yarımadada koronavirus yuqunçından vefat etkenlerniñ sayısı arta, dep qayd ete. Soñki eki aftada 49 vefat qayd etildi, 28-i soñki aftada.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
