په افغانستان کې د بېلابېلو خواوو، شخصیتونو او بنسټونو له خوا د ازادي راډیو د خبریال الیاس داعي پر وژنې خواشینې ښودل شوې ده.
الیاس داعي نن سهار د هلمند مرکز لښکرګاه کې هغه مهال ووژل شو چې پر موټر یې مقناطیسي ماین وچاودېد.
پېښه کې د داعې ورور چې ځایي خبریال و، ټپی شو.
د ازادي راډیو مشر قادر حبیب الیاس داعی یو زړور او مسلکي خبریال یاد کړ: "دا یو زړه بوږنونکی او ټکان ورکوونکی خبر و چې ما نن سهار واورېده، موږ دا حمله محکوموو، الیاس داعي ۲۰۰۸ کال نه را په دې خوا د ازادي راډیو سره کار کاوه چې نوموړی یو تکړه، بې طرفه او زړور خبریال و."
د ازادې اروپا/ازادي راډیو د عمومي ریاست سرپرستې ډیزې سیندلر ویلي، داعي یو زړور او ژمن خبریال و او هېڅکله له هلمنده د راپور ورکولو پر مهال زړه نا زړه نه و.
مېرمن سندلر ویلي، د داعي وژنه یو بزدلانه عمل دی چې یوې ځوانې کورنۍ ته یې مرګونی ګزار ورکړ او افغانستان یې له یوه تکړه خبریاله بې برخې کړ.
په کابل کې د امریکا سفارت، د بشري حقونو کورنیو او بهرنیو ادارو او د خبریالانو ملاتړو بنسټونو دا برید غندلی دی.
د ارګ په خبرپاڼه کې د ولسمشر محمد اشرف غني په حواله راغلي: "تروریستي ډلې د دغه وړ جنایتونو او بریدونو په ترسره کولو سره د بیان ازادي او د خبریالانو رسا غږ نه شي محدودولی".
په افغانستان کې د خبریالانو ملاتړو بنسټونو له اړوندو ادارو غوښتي چې د داعې د وژنې پیښه وڅیړي.
د دې وژنې پړه چا نه ده منلې. یوه طالب ویاند ذبیح الله مجاهد آزادي راډیو ته وویل چې په دې اړه پلټنه کوي.
