په روسیه کې یو شمېر مسلمانو مذهبي مشرانو فتوا صادره کړې چې مسلمانان دې له غیر مسلمان وګړو سره ودونه نهکوي.
له دې اقدام سره د روسیې په ملي اسلامي شورا کې مخالفتونه رامنځته شوي او دې مسئلې ته د نړیوالو پام وراوښتی دی.
په روسیه کې د مسلمانانو د مذهبي مشرانو شوراګانو ریاست په جولای میاشت کې دا فتوا ورکړې وه.
د دې فتوا له مخې یوازې مسلمان نارینه کولای شي له غیر مسلمانې ښځې سره د یوه مفتي له تأیید وروسته واده وکړي.
تر دې فتوا یوه ورځ وروسته د یاد ریاست مرستیال مشر دامیر موخیت دینوف په یوه اعلامیه کې وویل چې دا پرېکړه د ټول ریاست استازیتوب نهکوي.
ده په اعلامیه کې ویلي چې په دې برخه کې نظرونه بېل دي او ټول عالمان د دې فتوا ملاتړ نهکوي او یا هم د فتوا له یوازې یوې برخې سره موافق دي.
انترفکس خبري اژانس د یوه متخصص له قوله لیکلي چې فتوا باید د ټول ریاست ملاتړ ولري کنه باطله ګڼل کېږي.
په روسیه کې ۱۵ میلیونه مسلمانان اوسي.
