Rusiye FSBsi devlet hainliginde qabaatlanğan qırımlı İvan Yatskinniñ davası boyunca tahqiqatnı küzde bitirmege planlaştıra. Bu aqta advokatı Nikolay Polozov Qırım.Aqiqatqa bildirdi.
«Oña qarşı tahqiqat tedbirleri devam ete, muntazam sürette keçirile. Tahqiqat areketleriniñ tarzı aqqında bir şey aytıp olamayım, çünki aydınlatmama senetini imzaladım, davada Rusiye devlet sırı mevcut», – dedi Polozov.
Onıñ aytqanına köre, tahqiqat tedbirleri küzge qadar bitecek ve advokat cinaiy dava malümatını ögrenip başlaycaq.
FSB tahqiqatçısı Yatskinniñ davası boyunca malümatnı açıq sürette izaatlamadı.
Daa evel berilgen malümatqa köre, Moskvadaki mahkeme Yaktsinniñ apis cezasını daa eki ayğa uzattı, o, Moskvadaki Lefortovo SİZOsında 2020 senesi oktâbrniñ 16-na qadar qalacaq.
Qırımnıñ Curçı rayonınıñ Aybar (Voykovo) köyüniñ sakini İvan Yatskin 2019 yılda oktâbr 16-sında tutuldı. Bu dekabr ayında belli oldı.
Polozov, Yatskin apiske alınğan soñ Qırımdan Moskvağa çıqarıldı, dep bildirgen edi. Onıñ aytqanına köre, Rusiye quvetçileri qırımlığa «büyük maneviy basqı» yaptı.
TASS Rusiye haber agentliginiñ bildirgenine köre, qırımlığa qarşı dava tafsilâtları «tahqiqat menfaatları içün» aydınlatılmay.
Qırım.Aqiqatnıñ Ukraina telükesizlik hızmetine yollağan muracaat cevabında İvan Yatskin UTH ile işbirligi yapmadı, dep aytıla.
Daa evel o «Lefortovo» Moskva tahqiqat komitetinden Ukraina prezidenti Volodımır Zelenskıy ve Ukraina Yuqarı Radasınıñ insan aqları vekâletlisi Lüdmila Denisovağa mektüp yazıp, onı deñişim cedveline kirsetmege ve qorantasına maddiy yardım köstermege rica etti.
