Առողջապահության նախարար Արսեն Թորոսյանը հերքում է մամուլում վերջին օրերին համառորեն շրջանառվող լուրերը իր հրաժարականի մասին։
«Վարչապետի հետ նույնիսկ չեմ հիշում վերջի անգամ երբ եմ հանդիպել, էնքան առաջ ա էղել, էնքան վաղ ա էղել, հետևաբար չեմ ունեցել` եթե կարճ: Նման հրապարակումներ հիշում եմ, որ կան արդեն էրկու տարի ա մոտավորապես, հետևաբար իմաստ չեմ գտնում պատճառներ փնտրել, թե ինչու: Միգուցե ոմանց դրդմամբ, միգուցե գլոբալ քաղաքական շահարկումների, ոչ միայն իմ անձով պայմանավորված...», - լրագրողներին այսօր ասաց Թորոսյանը:
Տեղեկությունը այսպես էին հիմնավորում. վարչապետը դժգոհ է կորոնավիրուսի համաճարակի շրջանակներում նախարարի կատարած աշխատանքից։
Արսեն Թորոսյան. – «Կորոնավիրուսի դեմ պայքարը Առողջապահության նախարարության գործը չի միայն, այլ Հայաստանի Հանրապետության ընդհանրապես: Եվ էդպես էլ եղել է: Բոլոր գերատեսչությունները իրենց մասով արել են իրենց աշխատանքները և շարունակում են անել: Մենք էլ մեր մասով: Եվ Հայաստանի Հանրապետության քաղաքացիների` կորոնավիրուսով հիվանդացած և դժբախտաբար մահացած, տոկոսը ցույց ա տալիս, որ առողջապահական համակարգը արել ա ավելին, քան կարող էր»:
Արսեն Թորոսյանը այսօր Ազգային ժողովում մանսակցում էր բյուջետային ծրագրերի աշխատանքային քննարկմանը։ Իր հրաժարականի մասին համառ լուրերի ֆոնին հրապարակվեց վարչապետի որոշումը Արսեն Թորոսյանի 19 օրյա արձակուրդի մասին, որը կմեկնարկի օգոստոսի 31 -ին։
Հարցին, թե ինչու հիմա, երբ համաճարակը դեռ հաղթահարված չէ, Թորոսյանն արձագանքեց. – «Որևէ մեկը իրավունք չունի էդ նպատակահարմարությունը իմ արձակուրդի շահարկել»:
Առողջապահության նախարարը չի բացառում Հայաստանում կորոնավիրուսի երկրորդ ալիքի հավանականությունը. – «Մենք երկրորդ ալիք կամ կրկնակի ակտիվացում կարող ենք սպասել, սկսած մարդկանց հենց շարժունակությունից. դա տնտեսական ակտիվությունն ա, դպրոցների բացումից, ինչպես նաև ավելի ցուրտ սեզոնից»: