Фаяз Закиров игенче һөнәрен гомерлеккә үзенә юлдаш иткән
Гәләветдинов фермерлык хуҗалыгы игенчесе Фаяз Закировның комбайн штурвалы артына утыруына быел 45 ел тулды.
Үз вакытында Иске Арыш авылының данлыклы механизаторы булып итанылган әтисе Рәкыйп аганың һөнәрен мирас итеп алуына һич кенә дә үкенми ул. Ул бу хезмәтне бала вакытыннан ук үз итә. Әтисе янында чуалып йөри-йөри үзенең дә эштә катнашасы килә аның. Һәм бишенче сыйныфларда укыганда ук комбайнчы ярдәмчесе булып эшли башлый. Җәйге ял чорында малай үзен уңай яктан танытып өлгергәнгә, икенче елны да аны хуҗалык җитәкчеләре үзләренә эшкә чакыралар.
Ә инде 12 яшендә Фаязга СК-4 комбайнын ышанып тапшыралар. Әнә шулай кече яшьтән үк ул игенчелек серләренә төшенеп үсә. Ә мәктәптән соң иптәшләре белән авыл хуҗалыгы техникаларын яхшырак өйрәнү теләге белән район техник училищесында укый башлый. Шулай итеп Фаяз игенче һөнәрен гомерлеккә үзенә юлдаш итә. Быелгы урып җыю эшләренә дә ул зур хәстәрлек белән килгән.
Олы юлга чыкканда иптәшең үзеңнән яхшырак булсын диләр бит. Фаяз да иңендә бай тәҗрибәсе булган механизатор Рәиф Фатыйховны үз янына ярдәмче итеп алган. Менә дистә елдан артык инде ул һәр көнне туган авылы Иске Арыштан Крәшен Казысы төбәгенә килеп, күп төрле хуҗалык эшләрендә катнаша. Ә урып-җыю эшләренә ул быел аеруча зур хәстәрлек чаралары күргән. Бу көннәрдә ул 200 гектар мәйданны биләгән арыш басуында киеренке хезмәт куя. ә монда эшне тәмамлагач елның –елында алар күрше-тирә хуҗалыкларга ярдәмгә ашыгалар.
Җәй барышында табигать шартлары беркадәр көйсезләнеп китеп, чамадан тыш эссе көннәр башлангач корылык килә икән дип нык борчылган ул. Әмма ходайның рәхмәте белән шифалы яңгырлар явып киткәч, күңелләре күтәрелгән игенченең. Икмәк кенә булсын без аларны мөмкин кадәр кыска вакыт эчендә зур югалтуларсыз җыеп алачакбыз ди,–комбайнчы.
Идрис Аметов.
Автор фотосы.