Աշխատանքի և սոցիալական հարցերի փոխնախարար Սմբատ Սաիյանը ԱԺ նիստի ժամանակ խորհրդարանին խնդրեց երկրորդ ընթերցմամբ դեմ քվեարկել կենսաթոշակների անկանխիկ եղանակով վճարման նախագծին:
«Պետական կենսաթոշակների մասին» օրենքում փոփոխոթւյուններ և լրացումներ կատարելու մասին և կից ներկայացված նախագծերի փաթեթին առաջին ընթերցմամբ խորհրդարանը կողմ է քվեարկել: Փոխնախարարը հիշեցրեց նախագծի դրույթները:
«Խոսքը վերաբերում է կենսաթոշակների վճարման անկանխիկ եղանակի ներդրմանը, մասնավորապես, առաջարկվում է կենսաթոշակի վճարման հիմնական եղանակ սահմանել անկանխիկ, բանկային հաշվի միջոցով վճարման եղանակը՝ բացառություններ սահմանելով որոշակի կատեգորիայի անձանց համար: Կառավարությունն առաջարկել էր ժամանակացույց սկսել 2020 թվականի հուլիսի 1-ից և աստիճանաբար, մեկամյա ժամկետում համակարգում ընդգրկվում էին նաև քաղաքային բնակավայրերը, դրանից հետո արդեն գյուղական բնակավայրերը՝ կախված բնակչության քանակից»,- նախագիծը ներկայացրեց փոխնախարար:
Սմբատ Սաիյանն ասաց, որ առաջինից երկրորդ ընթերցում ընկած ժամանակահատվածում քննարկումների արդյունքում որոշվել էր համակարգի ներդրման մեկնարկի ամսաթիվը տեղաշարժել երկու ամսով և սահմանել սեպտեմբերի 1-ը, սակայն որոշում կայացվեց ամբողջ գործընթացը հետաձգել վեց ամսով, այլ ոչ միայն մեկնարկը երկու ամսով:
«Ուստի պետք է խնդրենք խորհրդարանին դեմ քվեարկել այս տարբերակին, որ Կառավարությունը հանավորություն ունենա ներկայացնել առաջարկություններ, որ կարողանանք մեկ անգամ ևս քննարկել ժամկետների խնդիրները և լրամշակված երկրորդ ընթերցմամբ ներկայացնենք խորհրդարանի քննարկմանը»,- ասաց նա:
ԱԺ նախագահ Արարատ Միրզոյանը արձագանքեց. «Սիրով, պարոն Սաիյան, սիրով»: