Համաձայն չեմ դիտարկման հետ, թե ԱԺ-ում ընդդիմությունը ծնվելու է «Իմ քայլը» դաշինքից. Ա. Միրզոյան
Համաձայն չեմ դիտարկման հետ, թե ԱԺ-ում ընդդիմությունը ծնվելու է «Իմ քայլը» դաշինքից: Այս մասին այսօր «Իմ քայլը» դաշինքի քննարկումից հետո լրագրողների հետ զրույցում ասաց առաջին փոխվարչապետի պաշտոնակատար, «Իմ քայլը» դաշինքի՝ ԱԺ նախագահի թեկնածու Արարատ Միրզոյանը:
«Ես համաձայն չեմ դիտարկման հետ, թե ընդդիմություն չկա, և համաձայն չեմ, որ ընդդիմությունը կաշկանդված է լինելու զանազան հարցերով քննադատել կառավարությանը: Եվ ես համաձայն չեմ նաև դիտարկման հետ, թե ընդդիմություն ծնվելու է «Իմ քայլը» դաշինքից: Եթե այդ մտքի տակ նկատի է առնվում, որ «Իմ քայլը» դաշինքում բոլոր հարցերն այդպես ուղղահայաց կերպով չեն հրահանգվելու, այլ լինելու են մեծ քննարկումներ ներքին, ապա վստահաբար, այո, լինելու են, և որոշումները կայացվելու են քննարկումների արդյունքում»,- նշեց նա:
Հիշեցնենք, որ օրեր առաջ ՀՀ փոխվարչապետի պաշտոնակատար Տիգրան Ավինյանը հայտարարել էր, որ իրական ընդդիմությունը, իր համոզմամբ, «Իմ քայլը» ֆրակցիայի ներսում է լինելու:
Ա. Միրզոյանը նաև հաստատեց, որ այս պահին ձեռք բերված համաձայնություններով՝ իր թեկնածությունն է առաջադրվելու ԱԺ նախագահի պաշտոնում: «Իմ ցանկությունն էր լինել օրենսդիրում, և դա այն պատճառով չէր, որ առաջին փոխվարչապետի պաշտոնը կրճատվում է: Գիտակցումը կա, որ շատ ծանր աշխատանք է սպասվում, բայց առաջին փոխվարչապետի աշխատանքն էլ ամենաթեթևներից չէր»,- ասաց նա:
Հարցին, թե կան կառավարության այլ անդամներ, ովքեր գործադիրից գործուղվելու են ԱԺ, Արարատ Միրզոյանը պատասխանեց. «Կան անուններ, դա կապված է և նրա հետ, որ տարբեր անձինք գուցե օրենսդիրում շատ ավելի լուրջ աշխատանք ունեն անելու, և կապված է նաև, չեմ թաքցնի՝ կառավարության կառուցվածքային փոփոխությունների հետ»: