ԱԺ նախագահի պաշտոնում առաջարկվել է Ա. Միրզոյանի, փոխնախագահների պաշտոնում՝ իմ և Լ. Նազարյանի թեկնածությունները. Ա. Սիմոնյան
Ազգային ժողովի նախագահի պաշտոնում առաջարկվել է Արարատ Միրզոյանի, փոխնախագահների պաշտոնում՝ Ալեն Սիմոնյանի և Լենա Նազարյանի թեկնածությունները: Այս մասին այսօր՝ դեկտեմբերի 19-ին, «Մարիոթ» հյուրանոցում «Իմ քայլը» դաշինքի քննարկումից հետո լրագրողներին ասաց դաշինքից ընտրված պատգամավոր Ալեն Սիմոնյանը:
«Իմ քայլը» խմբակցության ղեկավարի պաշտոնում առաջարկվել է մշակույթի նախարարի պաշտոնակատար Լիլիթ Մակունցի թեկնածությունը, իսկ խմբակցության քարտուղարի պաշտոնում՝ տարածքային կառավարման և զարգացման փոխնախարար Հակոբ Սիմիդյանինը:
«Ինչպես նաև առաջարկվել են մի քանի հանձնաժողովների նախագահների թեկնածություններ, և կարելի է ասել, որ խմբակցության կողմից ընդունվել են այդ բոլոր առաջարկները: ՔՊ վարչությունը և վարչապետը առաջարկեցին այն թեկնածությունները, որոնք մենք քննարկել էինք, եղավ հարց ու պատասխան, և վերջում քվեարկությամբ վարչության բոլոր առաջարկներն ընդունվեցին»,- հայտնեց Ալեն Սիմոնյանը:
Հարցին, թե ԱԺ մշտական հանձնաժողովների թիվն ավելացնելու հարցը քննարկվել է, թե ոչ, Ա. Սիմոնյանը պատասխանեց. «Հանձնաժողովների թիվն այս պահի դրությամբ 10-ն է: Կարող է ինչ-որ քննարկում լինի, և փոփոխություն լինի, չեմ բացառում»:
Պատգամավորը նաև հայտնեց, որ քննարկմանը անդրադարձ է կատարվել միայն ԱԺ պաշտոններում թեկնածություններին, կառավարության վերաբերյալ հարցեր չեն քննարկվել: