Նորվեգացի զբոսաշրջիկին Տաշիրում կողոպտած անձանց ոստիկանները հայտնաբերել են ու բերման ենթարկել (տեսանյութ)
Դեկտեմբերի լույս 17-ի գիշերը՝ 0 ժամ 30-ի սահմաններում, Նորվեգիայի Թագավորության քաղաքացի 42-ամյա մի տղամարդ, որը ՀՀ է այցելել որպես զբոսաշրջիկ, ոստիկանության Լոռու մարզային վարչության Տաշիրի բաժնում հանցագործության մասին հաղորդում է տվել։
Ըստ հաղորդման՝ ոստիկանություն դիմելուց հինգ ժամ առաջ Տաշիր-Գոգավան ճանապարհի 4-րդ կիլոմետրին երեք տղամարդ քաշքշել է նրան, ոտքերով հարվածել որովայնին ու հափշտակել սպորտային պայուսակը։ Պայուսակում եղել են անձնագիրը, բանկային քարտեր, բջջային հեռախոս, այլ իրեր և 750.000 դրամ։
Հարուցվել է քրեական գործ կողոպուտի և փաստաթղթեր հափշտակելու կամ վնասելու հատկանիշներով։ Ձեռնարկվել են ծավալուն հետախուզական միջոցառումներ ու քննչական գործողություններ՝ կատարվածի հանգամանքները պարզելու, օտարերկրացուն կողոպտած անձանց ինքնությունը պարզելու և նրանց հայտնաբերելու ուղղությամբ։ Ժամեր տևած հետախուզական միջոցառումները արդյունք տվին։
Դեպքի վայրից մի քանի հարյուր մետր այն կողմ՝ Տաշիր գետում, հայտնաբերվել է հափշտակված պայուսակը։ Պայուսակում առկա իրերի մի մասն էլ հայտնաբերվել է դեպքի վայրից գետ տանող ճանապարհի տարբեր հատվածներում։
Տաշիրի քրեական հետախույզները շուտով հայտնաբերել են նաև հենց Տաշիրի բնակիչներ, 23-ամյա Երվանդ Գրեյանին, 27-ամյա Աշոտ Սինասյանին, Լոռու Լեռնահովիտ գյուղում ապրող, 27-ամյա Սարկիս Սարկիսյանին։ Երիտասարդները կողոպուտ կատարելու կասկածանքով բերման են ենթարկվել բաժին, ապա ներկայացվել տարածքային նախաքննական մարմնին՝ հարցաքննության։ Նրանք ձերբակալվել են։
Հետագա միջոցառումներով իրավապահները հայտնաբերել են հափշտակված գումարը, որը թաքցված էր Սարկիս Սարկիսյանենց ավտոտնակում։
Արձանագրենք, որ հայ իրավապահների պրոֆեսիոնալ գործողությունների շնորհիվ ժամերի ընթացքում հանցագործությունը բացահայտվել է, հայտնաբերվել են նաև նորվեգացի զբոսաշրջիկի իրերը։ Ցավով արձանագրենք նաև, որ մեր հյուրընկալ ժողովրդին հարիր չէ նման ոտնձգություններ կատարել զբոսաշրջիկների նկատմամբ։