Բրազիլիայի նորընտիր նախագահ Ժաիր Բոլսոնարուն, որի պաշտոնավարումն սկսում է հունվարի մեկից, հայտարարել է, որ կօգտագործի «օրենքի և ժողովրդավարության շրջանակներում» բոլոր հնարավոր միջոցները Կուբայի և Վենեսուելայի իշխանություններին դիմակայելու համար:
Այս մասին հաղորդում է Reuters գործակալությունը՝ նշելով, որ Բոլսոնարուն չի թաքցնում իր բացասական վերաբերմունքը սոցիալիստական գաղափարների նկատմամբ, ինչն արդեն դրսևորվել է Կուբայի հետ դիվանագիտական սկանդալով: Նոյեմբերի կեսերին Կուբայի առողջապահության նախարարությունը հայտարարել է Բրազիլիայից մի քանի հազար կուբացի բժիշկների և բուժաշխատողների հետ կանչելու մասին, որոնք տարիներ շարունակ աշխատել են այնտեղ՝ «Ավելի շատ բժիշկներ» ծրագրի շրջանակներում:
Այդ որոշումը հետևել է Բոլսոնարուի հայտարարությանը, որով նա կասկածի տակ էր առել կուբացի մասնագետների որակավորումը, քննադատել էր օգնության ծրագիրը և սպառնացել պաշտոնավարումն սկսելուն պես խզել դիվանագիտական հարաբերությունները Կուբայի հետ:
Բացի դրանից, Բոլսոնարուն չեղարկել էր Վենեսուելայի նախագահ Նիկոլաս Մադուրոյի և Կուբայի նախագահ Միգել Դիաս Կանելի հրավերն իր երդմնակալության արարողությանը: Նա իր թվիթերյան էջում գրել էր, որ «ռեժիմները, որոնք խախտում են իրենց քաղաքացիների ազատությունները և ակնհայտորեն դեմ են հանդես գալիս Բրազիլիայի ապագա կառավարությանը, ներկա չեն լինի 2019-ին կայանալիք արարողությանը»:
