Իրանի արտաքին գործերի նախարարության մամուլի խոսնակ Բահրամ Ղասեմին մեկնաբանել է թուրքական ԶՈւ-ի՝ Սիրիայի հյուսիսում քրդական ուժերի դեմ հնարավոր ռազմական գործողության մասին հայտարարությունները:
Ինչպես գրում է «Յենի Աքըթ» պարբերականը, Ղասեմին նշել է, որ առանց Սիրիայի իշխանությունների հավանության այդ երկրի տարածքում ցանկացած գործողություն իրենք համարում են անօրինական:
«Որևէ երկիր Սիրիայի տարածքում չպետք է ռազմական գործողություններ ձեռնարկի առանց այդ երկրի իշխանության թույլտվության: Յուրաքանչյուր քայլ պետք է ստանա Դամասկոսի համաձայնությունը», - ասել է Իրանի ԱԳՆ խոսնակը:
Ավելին՝ Ղասեմին շեշտել է, որ նման ռազմական գործողության իրականացման դեպքում կարող է էապես բարդանալ Իրանի, ՌԴ-ի և Թուրքիայի միջև Սիրիայի թեմայով Աստանայի բանակցությունների գործընթացը:
Նշենք, որ օրերս Թուրքիայի նախագահ Ռեջեփ Թայիփ Էրդողանը հայտարարել է, որ թուրքական ԶՈւ-ն մի քանի օրից կգրոհի Սիրիայի հյուսիսում գտնվող Մանբիջն ու Եփրատի արևելյան ափին գտնվող քրդական ջոկատների ռազմական դիրքերը:
