პარლამენტის საპროცედურო საკითხთა და წესების კომიტეტმა საქართველოს პრეზიდენტის სადეპუტატო უფლებამოსილების შეწყვეტის საკითხზე იმსჯელა. სალომე ზურაბიშვილს დეპუტატის უფლებამოსილება მას შემდეგ შეუწყდება, რაც მას მხარს პლენარული სხდომა დაუჭერს. საკითხი დასამტკიცებლად უახლოეს პლენარულ სხდომაზე გავა.
პარლამენტის თავმჯდომარეს სალომე ზურაბიშვილისთვის დეპუტატის უფლებამოსილების შეწყვეტის შესახებ განცხადებით მისმა საპარლამენტო მდივანმა, დიმიტრი გაბუნიამ 18 დეკემბერს მიმართა. პარლამენტის საპროცედურო საკითხთა და წესების კომიტეტის თავმჯდომარის, გიორგი კახიანის განმარტებით, კანონი არ დარღვეულა იმით, რომ სალომე ზურაბიშვილს აქამდე არ შეწყვეტია დეპუტატის უფლებამოსილება.მისი თქმით, როდესაც პარლამენტის წევრი სტატუსთან შეუთავსებელ თანამდებობას იკავებს, მას იმავე მომენტიდან უწყდება უფლებამოსილება.
„კანონი არ დარღვეულა“,-უთხრა რადიო თავისუფლებას კონსტიტუციონალისტმა, ვახტანგ ხმალაძემაც-"ძველი რეგლამენტით პარლამენტი უბრალოდ ცნობად იღებდა ფაქტს შეუთავსებელი თანამდებობის დაკავებისა და კენჭი არც ეყრებოდა ხოლმე ამას, მაგრამ შემდგომ ცვლილება შევიდა და კენჭს მაინც უყრიან. კენჭისყრა ინაუგურაციიდან პირველივე სხდომაზე უნდა მოხდეს.“-განაცხადა ვახტანგ ხმალაძემ
სალომე ზურაბიშვილის ადგილმონაცვლის შუალედური არჩევნები მთაწმინდის ოლქში გაზაფხულზე გაიმართება.
