Хонанда Сан Жей 19 декабрь куни “Ўзбекконцерт” давлат муассаси директори Одил Абдуқаҳҳоров билан учрашганини ва лицензия олишини маълум қилди. Хонанда буни ижтимоий тармоқлардаги саҳифасига жойлаштирган видеомурожаатида айтди. “Қадрли мухлисларим, яхши янгилик бор. Мен энди лицензия оламан. Бу бахтни юрагимга сиғдира олмаяпман. Шунинг учун бу янгиликни сиз билан бўлишяпман. Мана, ҳозиргина “Туркистон” санъат саройида Одил Абдуқаҳҳоров билан гаплашиб чиқдим. У киши жуда самимий инсон экан. Биз аллақачон кўришишимиз керак эди. Лекин у кишининг Ўзбекистонда эмаслиги туфайли кўриша олмадик”, дейди хонанда ўз видеомурожаатида. Унинг айтишича, “Ўзбекконцерт” директори соқол масаласида ҳам Сан Жей билан келишиб олган. Хонанда “соқолини бутунлай олиб ташламаслигини, бироз тартибга келтиришини” айтди. “Яна бир янгилик бор. Биз яқинда рэпперлар учун конференция қиламиз. Эндиликда Ўзбекистонда рэп жанрини ҳам янги даражага олиб чиқамиз”, дейди хонанда. Бундан аввал Сан Жей президентга видеомурожаат билан чиққан эди. Мурожаатдан сўнг “Ўзбекконцерт” соқоли туфайли лицензия ололмаётганини иддао қилган хонандани ижодий кўмаклашиш кенгашининг навбатдаги йиғилишига чақирган ва бу иш амалга ошмаганди.
