ՌԴ փոխարտգործնախարարն ասել է՝ որ դեպքում Մոսկվան կընդունի Ուկրաինայի նախագահական ընտրությունների արդյունքները
Ռուսաստանի փոխարտգործնախարար Գրիգորի Կարասինը հայտնել է, թե որ դեպքում Ռուսաստանը կընդունի 2019թ. Ուկրաինայում կայանալիք նախագահական ընտրությունների արդյունքները, գրում է gazeta.ru-ն:
«Ռուսաստանը ցանկացած դեպքում հարգանքով կընդունի ուկրաինացիների ընտրությունը, եթե ընտրությունները լինեն ազատ ու ժողովրդավար»,- ասել է Կարասինը՝ խուսափելով այն հարցի պատասխանից, թե արդյոք ռուսական կողմն Ուկրաինայի գործող նախագահ Պյոտր Պորոշենկոյի վերընտրման դեպքում պատրաստ է նրա հետ համագործակցության:
«Եկեք գուշակություններով չզբաղվենք: Սպասենք նախընտրական քարոզարշավի ավարտին ու իմանանք հաղթողի անունը»,- ասել է ՌԴ ԱԳՆ փոխղեկավարը:
Միևնույն ժամանակ նա տարակուսանք է հայտնել այն առումով, որ ընտրությունները փաստացի անցացվելու են երկրի մի քանի շրջաններում սահմանված ռազմական դրության պայմաններում:
Կարասինի խոսքով՝ կարևոր է, որ Ուկրաինայում նախագահական ընտրությունների հաղթողը պատրաստ լինի ՌԴ-ի հետ կառուցողական երկխոսության և պատասխանատու լինի իր ստանձնած պարտավորվածությունների համար:
Հիշեցնենք, որ նոյեմբերի 25-ի առավոտյան ՌԴ Անվտանգության դաշնային ծառայությունը հայտնել է Ուկրաինայի ռազմածովային ուժերին պատկանող նավերի կողմից ռուսական ջրային սահմանի խախտման մասին: Նշվում է, որ երեք ուկրաինական նավ ուղղություն է վերցրել դեպի Կերչի նեղուց՝ նախապես նավերի անցման համար համապատասխան դիմում չներկայացնելով:
Արդյունքում ռուսական կողմը բեռնանավերով փակել է նեղուցը: Բացի այդ, ռուսական սահմանապահ նավը վնասել է ուկրաինական քարշակին, որը հետևում էր նավերի խմբին: Այնուհետև Ռուսաստանն Ուկրաինայի ռազմածովային ուժերի գործողությունների պատճառով Սու-25 օդանավերը հերթապահության է ուղարկել Կերչի նեղուցի շրջանում:
Կիևը Մոսկվային մեղադրել է բացահայտ ագրեսիվ գործողություններ կատարելու համար: Կիևը նաև հայտնել է Ռուսաստանի կողմից իր նավերի ուղղությամբ կրակ բացելու ու նավերը գրավելու մասին: Ուկրաինայի ռազմածովային ուժերի փոխանցմամբ՝ ռուս սահմանապահները նավերը կանգնեցրել են զենքի կիրառմամբ: Դրա հետևանքով վիրավորվել է 3 ուկրաինացի զինծառայող: