შერიგებისა და სამოქალაქო თანასწორობის საკითხებში სახელმწიფო მინისტრმა ქეთევან ციხელაშვილმა, უკრაინის დროებით ოკუპირებული ტერიტორიებისა და იძულებით გადაადგილებულ პირთა მინისტრმა ვადიმ ჩერნიშმა და რეინტეგრაციის საკითხებში მოლდოვის რესპუბლიკის ვიცე-პრემიერმა კრისტინა ლესნიკმა ურთიერთგაგებისა და თანამშრომლობის შესახებ მემორანდუმს მოაწერეს ხელი.
მემორანდუმის ფარგლებში მხარეები სურვილს გამოთქვამენ განამტკიცონ და შემდგომში განავითარონ თანამშრომლობა კონფლიქტების მოგვარებისა და მშვიდობის მშენებლობის სფეროში მიღებული გამოცდილებისა და საუკეთესო პრაქტიკის გაზიარების თვალსაზრისით- შეიქმნება სამმხრივი უწყებათაშორისი პლატფორმა, დაიწყება სტრატეგიული რეგიონალური თანამშრომლობა და ორმხრივი მხარდაჭერისათვის გზების განსაზღვრა.
საქართველოს სახელმწიფო მინისტრის, ქეთევან ციხელაშვილის შეფასებით, სამივე ქვეყანას დღემდე ერთმანეთის მსგავსი პრობლემა აქვს გადაუჭრელი კონფლიქტებისა და ოკუპირებული ტერიტორიების სახით. შესაბამისად, კონფლიქტის მშვიდობიანი მოგვარების მიმართულებით ძალისხმევის გაერთიანება კიდევ უფრო ეფექტურს გახდის საქმიანობას, რომელიც პირველ რიგში ადამიანების უფლებრივი და ჰუმანიტარული მდგომარეობის გაუმჯობესებას უკავშირდება.
მემორანდუმზე ხელის მოწერამდე სამმხრივი შეხვედრა გაიმართა, სადაც სამი ქვეყნის მინისტრმა ოკუპირებულ ტერიტორიებზე არსებული სიტუაცია მიმოიხილა.
