«ԱՄՆ-ն Իրանի հարցով ճնշում է գործադրել Հայաստանի վրա, սակայն հասկացել է՝ որքան կարևոր են այդ հարաբերությունները Երևանի համար». Իրանում ՀՀ դեսպան
Իրանում ՀՀ արտակարգ և լիազոր դեսպան Արտաշես Թումանյանը Թեհրանում «Հայ-իրանական կապեր, հնարավորություններ և մարտահրավերներ» խորագրով հանդիպման շրջանակում հայտարարել է, որ վերջերս Հայաստանում տեղի ունեցած քաղաքական զարգացումները չեն ազդել երկրի արտաքին քաղաքականության վրա:
Ինչպես նշում է iran-daily.com կայքը, ՀՀ դեսպանը մանրամասնել է, որ Վաշինգտոնը Երևանի վրա ճնշում է գործադրել Իրանի հետ կապերը կրճատելու նպատակով:
«ԱՄՆ-ն Հայաստանի հետ բանակցել է Թեհրան-Երևան կապերի վերաբերյալ, և նրանք հասկացել են, որ այդ հարաբերությունները մեծ նշանակություն ունեն մեզ համար»,-ասել է Թումանյանը:
Այս համատեքստում ՀՀ դեսպանն ընդգծել է, որ Երևանը մտադիր է ավելի շատ գազ ներկրել Իրանից, ինչպես նաև պատրաստակամ է ավելացնել Հայաստանից Իրան արտահանվող էլեկտրաէներգիայի ծավալը:
Նա նշել է, որ թեև Թեհրանն ու Երևանը թիրախավորել են երկու երկրների առևտրային շրջանառությունը հասցնել 1 մլրդ դոլարի, սակայն այդ ցուցանիշն առայժմ 200-250 մլն դոլարի սահմանում է: