ԶԼՄ-ներ. «Մանչեսթեր Յունայթեդի» նախկին ֆուտբոլիստը հինգշաբթի կնշանակվի ակումբի գլխավոր մարզչի պաշտոնում
«Մանչեսթեր Յունայթեդի» նախկին ֆուտբոլիստ Ուլե-Գունար Սուլշերը, որն այժմ գլխավորում է «Մոլդեն», հինգշաբթի` դեկտեմբերի 20-ին, կդառնա մանկունիացիների գլխավոր մարզչի ժամանակավոր պաշտոնակատարը, հայտնում է The Guardian-ը:
Նրա օգնականը կլինի Մայկ Ֆելանը, որը 14 տարի եղել է սըր Ալեքս Ֆերգյուսոնի օգնականը:
Աղբյուրի փոխանցմամբ, Սուլշերը ՄՅՈւ-ն կգլխավորի մինչև ընթացիկ մրցաշրջանի ավարտը, ինչից հետո մանկունիացիները հույս ունեն պայմանագիր կնքել «Տոտենհեմի» գլխավոր մարզիչ Մաուրիսիո Պոչետինոյի հետ: Ավելի վաղ հաղորդվում էր, որ արգենտինացի մասնագետը հետաքրքրված է ակումբի փոփոխմամբ:
Հիշեցնենք` «Մանչեսթեր Յունայթեդն» իր պաշտոնական կայքում ավելի վաղ հայտարարել էր Սուլշերի նշանակման մասին, սակայն ավելի ուշ հեռացրել էր այդ գրառումը:
Մանկունիացիները հրապարակել էին Սուլշերի` 1999 թվականի Չեմպիոնների լիգայի եզրափակչի` «Բավարիայի» հետ խաղում հեղինակած հաղթական գոլի տեսանյութը (2:1), որն ուղեկցել էին հետևյալ գրառմամբ.
«Սուլշերը կդառնա մեր գլխավոր մարզչի պաշտոնակատարը «Կամպ Նոոում» հեղինակած այս գոլով ակումբին տիտղոս պարգևելուց 20 մրցաշարջան անց»:
«Մանչեսթեր Յունայթեդը» 17 տուրից հետո անգլիական Պրեմիեր-լիգայի մրցաշարային աղյուսակի 6-րդ հորիզոնականն է զբաղեցնում` իր ակտիվում ունենալով 26 միավոր:
Ժոզե Մոուրինյուն 2016 թվականից էր գլխավորում անգլիական ակումբը և 2,5 տարում 3 տիտղոս է նվաճել ՄՅՈւ-ի հետ: