Լիբանանում զանգվածային հակակառավարական ցույցեր են սկսվել (լուսանկարներ)
Լիբանանում զանգվածային հակակառավարական բողոքի ակցիաներ են սկսվել: Դրանք կապված են վերջերս երկրում տեղի ունեցած դեպքի հետ, երբ տեղի բժիշկները հրաժարվել են առանց գումարի բուժել պաղեստինցի երեխային, ինչի հետևանքով վերջինս մահացել է:
Ինչպես նշում է ria.ru-ն, 3-ամյա երեխան գլխուղեղի անհապաղ վիրահատության կարիք ուներ: Վիրահատության արժեքը 25 000 դոլար էր: Երեխան կոմայի մեջ է ընկել, սակայն հիվանդանոցները հրաժարվել են նրան ընդունել, քանի որ ծնողները վճարունակ չեն եղել: Դրա հետևանքով փոքրիկը մահացել է:
Այս դեպքից վրդովված՝ երկրում պաղեստինցի փախստականների ճամբարներում բողոքի զանգվածային ալիք է բարձրացել: Նրանց են միացել նաև այլ քաղաքների հարյուրավոր բնակիչներ:
Մարդիկ դուրս են եկել փողոցներ՝ ծածանելով Լիբանանի ու Պաղեստինի դրոշները: Մասնակիցները բղավել են հակակառավարական կարգախոսներ՝ իշխանություններին մեղադրելով անարդար հասարակարգի ձևավորման համար: Այնուհետև մասնակիցների մի մասը փողոցներում մեքենաների անիվներ է հրկիզել:
Նշվում է, որ մայրաքաղաք Բեյրութում ցուցարարների ու իրավապահների միջև բախումներ են տեղի ունեցել:
Բեյրութում ցուցարարները բողքում են տնտեսական ու քաղաքական ոլորտում ստեղծված ճգնաժամային իրավիճակի դեմ: Հայտնի է, որ երկրի իշխանությունները մայիսից սկսած չեն կարողանում կառավարություն ձևավորել: